ភ្នំពេញ៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) និងជាប្រធានសមាគមបណ្តាញកសិករតេជោ ណែនាំឱ្យប្រជាកសិករមកពីសហគមន៍កសិកម្មនៃស្រុកទាំងអស់ក្នុងខេត្តកំពង់ធំ ត្រូវរួមគ្នាផលិតជីធម្មជាតិ ដើម្បីកាត់បន្ថយការប្រើប្រាស់ជីគីមីមានតម្លៃខ្ពស់។

ក្នុងពិធីសំណេះសំណាលកសិករមកពីបណ្តាសហគមន៍កសិកម្មនៅខេត្តកំពង់ធំ ឯកឧត្តមបណ្ឌិត កៅ ថាច បានលើកឡើងថា ការជួបជុំប្រជាកសិករ គឺចង់ផ្តល់ជូននូវព័ត៌មានថ្មីៗលើវិស័យកសិកម្ម ដែលត្រូវតែពង្រឹងផលិតភាពឱ្យបានខ្ពស់លើការផលិតក្នុងដំណាក់កាលជីគីមីឡើងថ្លៃដែលបញ្ហានេះមិនត្រឹមតែផ្តល់ការលំបាកដល់កសិករយើងប៉ុណ្ណោះទេ គឺកសិករលើពិភពលោកក៏ជួបប្រទះបញ្ហាដូចគ្នាដែរ។

ត្រង់ចំណុចនេះដែរ ឯកឧត្តមបណ្ឌិតប្រតិភូ បានសង្កត់ធ្ងន់ធ្ងរថា សហគមន៍ និងកសិករនៅទីនេះត្រូវរួបរួមគ្នាផលិតក្នុងស្រុក ដើម្បីកាត់បន្ថយការប្រើប្រាស់ជីគីមី ជួយកាត់បន្ថែមថ្លៃដើមផលិត ទោះបីឆ្នាំនេះបានផលតិច តែជាជំហ៊ានមួយអាចប្រសើរនៅឆ្នាំបន្ទាប់ទៀត ដែលកសិករយើងធ្វើកសិកម្មបានចំណេញនិងលក់បានថ្លៃ។ ក្នុងនោះ ឯកឧត្តមបណ្ឌិតប្រតិភូ ក៏មានការរៀបចំពិធីចុះអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការរវាង វិទ្យាស្ថានពហុបច្ចេកទេសខេត្តកំពង់ធំនិងសមាគមបណ្តាញកសិករតេជោ,អនុស្សារណៈនៃយោគយល់គ្នាស្តីពីកិច្ចសហប្រ តិបត្តិការរវាងវិទ្យាល័យចំណេះទូទៅនិងបច្ចេកទេសអនុវត្តកំពង់ឈើទាលនិងសមាគមបណ្តាញកសិករតេជោផងដែរ៕