ភ្នំពេញ៖ ប្រជាកសិករចំនួន ២៨៥គ្រួសារ ដែលមានផ្ទៃដីដាំដុះស្រូវជិត ៣៣០០ហិកតា នៅឃុំកំពង់គោ ស្រុកកំពង់ស្វាយ ខេត្តកំពង់ធំ បានផ្តិតមេដៃស្ម័គ្រចិត្តស្នើសុំចងក្រងគ្នាជា «សហគមន៍កសិកម្មទំនើប» ដើម្បីផលិតស្រូវសែនក្រអូប ក្នុងតម្លៃកុងត្រាទុក ១៣៥០៛/គីឡូក្រាម។

សហគមន៍កសិកម្មទំនើបនេះ គ្រោងនឹងចាប់ផ្តើមផលិតកម្មស្រូវសែនក្រអូប ក្នុងខែមេសា ឆ្នាំ២០២៥ ក្រោយពេលប្រមូលផលជុំចាស់រួច។ ក្នុងដំណើរការនៃការផលិតនេះ ប្រជាកសិករនឹងទទួលបានការធានាថ្លៃពិសេសទុកជាមុន, កសិករជាសមាជិកសហគមន៍កសិកម្មទំនើបទាំងអស់ ក៏នឹងទទួលបានទុនបានកម្ចីការប្រាក់ទាប និងការគាំទ្រទាំងស្រុងខាងផ្នែកបច្ចេកទេសពីក្រសួងកសិកម្ម រុក្ខាប្រមាញ់ និងនេសាទផងដែរ។

បើតាម ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម កសិករដែលមានបំណងចងក្រងជាសហគមន៍ទំនើបនេះ ភាគច្រើនជាអ្នកកំពុងផលិតស្រូវអូអឹម ដែលជាពូជរបស់ប្រទេសវៀតណាម។ ដោយមើលឃើញពីអត្ថប្រយោជន៍ទីផ្សារល្អនៃស្រូវសែនក្រអូប ស្របពេលដែលពូជស្រូវវៀតណាមកំពុងជួបបញ្ហាធ្លាក់ថ្លៃ ប្រជាកសិករទាំងនេះ បាននាំគ្នាងាកមករួមគ្នាផលិតជាសហគមន៍ និងចាប់យកពូជអង្ករក្រអូបរបស់កម្ពុជាវិញម្តង៕