ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងលោកជំទាវ Beth Van Duyne សមាជិកសភាសហរដ្ឋអាម៉េរិក និងជាសមាជិកគណៈកម្មាធិការចំនួន២ នៃសភាសហរដ្ឋអាម៉េរិក បង្ហាញការគាំទ្រក្នុងការជំរុញការវិនិយោគពីសហរដ្ឋអាម៉េរិកមកកាន់កម្ពុជា និងសកម្មភាពពាណិជ្ជកម្មរវាងប្រទេសទាំងពីរ បន្ថែមទៀត។

ក្នុងជំនួបពិភាក្សាការងារ កាលពីថ្ងៃទី១៦ ខែឧសភា ឆ្នាំ២០២៥ ឯកឧត្តម ស៊ុន ចាន់ថុល បានលើកឡើងអំពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្នុងការជំរុញការវិនិយោគឱ្យបានកាន់តែច្រើនបន្ថែមទៀតពីសហរដ្ឋអាម៉េរិកមកកាន់ប្រទេសកម្ពុជា។ ឯកឧត្តម ស៊ុន ចាន់ថុល ក៏បានលើកឡើងអំពីចំណងមិត្តភាព និងកិច្ចសហប្រតិបត្តិការរវាងប្រទេសទាំងពីរ ដែលឆ្នាំនេះជាខួបលើកទី ៧៥ឆ្នាំ នៃទំនាក់ទំនងការទូតរវាងប្រទេសទាំងពីរ ផងដែរ។

ទន្ទឹមនឹងនេះ លោកជំទាវ Beth Van Duyne សមាជិកសភាសហរដ្ឋអាម៉េរិក និងជាសមាជិក នៃគណៈកម្មាធិការចំនួនពីរ គឺគណៈកម្មាធិការស្តីពីរបៀប និងមធ្យោបាយ និងគណៈកម្មាធិការអាជីវកម្មធុនតូច នៃរដ្ឋសភាសហរដ្ឋអាម៉េរិក បានលើកឡើងអំពីការពិនិត្យលទ្ធភាពក្នុងការបង្កើនកិច្ចសហប្រតិបត្តិការរវាងកម្ពុជា-អាម៉េរិក ពាក់ព័ន្ធលើវិស័យអាទិភាពមួយចំនួន ផងដែរ។ នេះបើតាមការចុះផ្សាយរបស់ ក្រុមប្រឹក្សាអភិវឌ្ឍន៍កម្ពុជា នាថ្ងៃទី១៧ ខែឧសភា ឆ្នាំ២០២៥៕