ភ្នំពេញ៖ ការរៀបចំកន្លែងប្រមូលផ្តុំព័ត៌មានមួយកន្លែង (One-stop Shop) អំពីសេវាអេឡិចត្រូនិកសម្រាប់ធុរកិច្ច មានសារសំខាន់ដែលផ្តល់ភាពងាយស្រួលដល់ធុរជនក្នុងការស្វែងរកព័ត៌មានពាក់ព័ន្ធនឹងសេវាគាំទ្រធុរកិច្ច ដើម្បីពិនិត្យ និងបំពេញអនុលោមភាពអាជីវកម្មរបស់ខ្លួនប្រកបដោយតម្លាភាព។

ជាមួយគ្នានេះ អាទិភាពជាយុទ្ធសាស្ត្រ ស្តីពីការអភិវឌ្ឍសេវាអេឡិចត្រូនិកសម្រាប់ធុរកិច្ច ឆ្នាំ២០២៥-២០២៨ ផ្តោតសំខាន់លើការរៀបចំ និងពង្រឹងយន្តការផ្សព្វផ្សាយព័ត៌មានអំពីសេវាអេឡិចត្រូនិកឱ្យបានទូលំទូលាយទៅដល់ធុរជន ឬអ្នកប្រើប្រាស់ប្រព័ន្ធ តាមរយៈការពង្រីកមុខងាររបស់ថ្នាលbusiness.gov.kh ដោយគិតគូរអំពីមុខងារគាំទ្រផ្សេងៗ ដើម្បីសម្រួលដល់ធុរជន និងអ្នកប្រើប្រាស់ក្នុងការស្វែងរកព័ត៌មានពាក់ព័ន្ធនឹងសេវាធុរកិច្ច។

ចំពោះ សិក្ខាសាលាបញ្ជ្រាបការយល់ដឹង ការបង្កើតឯកសារផ្សព្វផ្សាយសម្បូរបែបច្រើនប្រភេទ និងច្រើនទម្រង់ ព្រមទាំងការផ្សព្វផ្សាយតាមបណ្តាញសង្គមនានា នឹងត្រូវអនុវត្តក្នុងគោលបំណងផ្តល់ព័ត៌មានច្បាស់លាស់ និងត្រឹមត្រូវអំពីការផ្តល់សេវាអេឡិចត្រូនិកសម្រាប់ធុរកិច្ចរបស់ក្រសួង-ស្ថាប័ន៕

ប្រភពពី៖ យុទ្ធសាស្ត្រស្តីពីការអភិវឌ្ឍសេវាអេឡិចត្រូនិកសម្រាប់ធុរកិច្ច ឆ្នាំ ២០២៥-២០២៨