ភ្នំពេញ៖ ក្រសួងទេសចរណ៍ បានសហការជាមួយស្ថានទូតចិនប្រចាំកម្ពុជា រៀបចំ «មហោស្រពតន្ត្រីទេសចរណ៍អន្តរជាតិ កម្ពុជា-ចិន» នៅថ្ងៃទី៦ ខែធ្នូ ឆ្នាំ២០២៥ ស្ថិតនៅខេត្តសៀមរាប ដើម្បីជំរុញការផ្សព្វផ្សាយសក្តានុពលទេសចរណ៍ដ៏សម្បូរបែបរបស់កម្ពុជា ពិសេសតំបន់សៀមរាបអង្គរទៅកាន់ទីផ្សារទេសចរចិន និងអន្តរជាតិ សំដៅទាក់ទាញទេសចរ និងវិនិយោគិនអន្តរជាតិ។

មហោស្រពតន្ត្រីទេសចរណ៍នេះ រៀបចំក៏ដើម្បីបន្តជំរុញការផ្សព្វផ្សាយយុទ្ធនាការ «ឆ្នាំទេសចរណ៍កម្ពុជា-ចិន ឆ្នាំ២០២៥» និងលើកកម្ពស់វិស័យសិល្បៈកម្ពុជា ផ្លាស់ប្តូរវប្បធម៌ និងពង្រឹងចំណងមិត្តភាពកម្ពុជា-ចិនឱ្យកាន់តែរឹងមាំ និងស្អិតរមួត ក្នុងនោះក៏ការចូលរួមសម្តែងពីសិល្បករ សិល្បការិនីជាតិ និងសិល្បករ សិល្បការិនីមកពីប្រទេសចិនផងដែរ។

ជាមួយគ្នានេះ ក្រសួងទេសចរណ៍ បានអំពាវនាវឱ្យគ្រប់សមាគមទេសចរណ៍ ប្រតិបត្តិករទេសចរណ៍ ផ្នែកឯកជន ស្ថាប័នពាក់ព័ន្ធ សារព័ត៌មានជាតិ-អន្តរជាតិ និងសាធារណជន ចូលរួមកម្មវិធីខាងលើដោយឥតគិតថ្លៃ និងជំរុញផ្សព្វផ្សាយអំពី «មហោស្រពតន្ត្រីទេសចរណ៍អន្តរជាតិ កម្ពុជា-ចិន»។ សម្រាប់ព័ត៌មានបន្ថែម អាចទំនាក់ទំនងតាមរយៈទូរសព្ទលេខ ០៩៦ ២៦៥ ៥៥៥៥ / ០១២ ៣១៣ ៧៨៩ (Telegram) ឬអ៊ីម៉ែល [email protected] / [email protected] ៕