ភ្នំពេញ៖ ក្រសួងពាក់ព័ន្ធទាំង៤ ក្នុងវិស័យកសិកម្មសហការគ្នាពង្រឹងការតភ្ជាប់ខ្សែច្រវាក់តម្លៃ និងបង្កើនភាពជាដៃគូជិតស្និទ្ធដើម្បីស្វែងរកដំណោះស្រាយលើបញ្ហាប្រឈមរួមគ្នានិងចាប់យកកាលានុវត្តភាពនៃការលើកស្ទួយសមត្ថភាពនៃវិស័យឯកជន ក្នុងការស្រូបយកនិងកែច្នៃវត្ថុធាតុដើមនៅក្នុងស្រុក និងបង្កើតជាទីផ្សារបន្ថែមជូនប្រជាកសិករ។ នេះបើយោងតាម ហ្វេសប៊ុក ឯកឧត្តម ឃឹម ហ្វីណង់ អ្នកនាំពាក្យក្រសួងកសិកម្ម ។

កិច្ចប្រជុំពិសេស ដែលធ្វើឡើងនៅថ្ងៃទី០៩ វិច្ឆិកា មានការអញ្ជើញចូលរួមពីសំណាក់ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងឯកឧត្តមបណ្ឌិតសភាចារ្យ ជូ វិជិត្ត រដ្ឋលេខាធិការប្រចាំការនៃក្រសួងសេដ្ឋកិច្ចនិងហិរញ្ញវត្ថុ៕