ភ្នំពេញ៖ ភូមិខ្មែរអ្នកធ្វើ ផ្សារទេសចរណ៍ខ្មែរ គឺជាផលិតផលទេសចរណ៍ដ៏ទាក់ទាញថ្មីមួយដែលភ្ញៀវទេសចរជាតិ និងអន្តរជាតិ មិនគួរមើលរំលង។ បើតាមការចុះផ្សាយរបស់ក្រសួងទេសចរណ៍ កាលពីថ្ងៃទី១៩ ខែតុលា ឆ្នាំ២០២៥ ភូមិខ្មែរអ្នកធ្វើ ផ្សារទេសចរណ៍ខ្មែរ ជាផ្សារទេសចរណ៍ខ្មែរ បង្កើតឡើងក្នុងគោលបំណងជួយជំរុញសក្ដានុពលទេសចរណ៍ដ៏សម្បូរបែប និងការអភិវឌ្ឍផលិតផលទេសចរណ៍។

ការដាក់តាំងបង្ហាញ ភូមិខ្មែរអ្នកធ្វើ ផ្សារទេសចរណ៍ខ្មែរ ដែលមានការអញ្ជើញចូលរួមពី ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ នេះ គឺមានការប្រមូលផ្ដុំផលិតផលក្នុងស្រុក សុទ្ធសឹងតែស្នាដៃរបស់ពលរដ្ឋខ្មែរនៅតាមមូលដ្ឋាន ដូចជាបន្លែ ផ្លែឈើ សម្ភារប្រើប្រាស់ វត្ថអនុស្សាវរីយ៍ ម្ហូបអាហារប្រចាំតំបន់ សេវាកម្មផ្សេងៗ នឹងមកប្រមូលផ្ដុំនៅក្នុងផ្សារទំនើប ជីប ម៉ុង ២៧១ មេហ្កាម៉ល។

គួរបញ្ជាក់ថា ភូមិខ្មែរអ្នកធ្វើ នេះ មិនត្រឹមតែជាផ្សារលក់ផលិតផល ប៉ុន្តែក៏រួមបញ្ចូលជាមួយនឹងស្ថាបត្យកម្ម ​រចនាប័ទ្មខ្មែរ សិល្បៈ វប្បធម៌ ប្រពៃណីដែលជាអត្តសញ្ញាណជាតិខ្មែរ ដើម្បីបង្ហាញពីភាពទាក់ទាញ និងបង្កើនការចាប់អារម្មណ៍ គម្រោង «ភូមិខ្មែរអ្នកធ្វើ» ឱ្យកាន់តែទូលំទូលាយ៕