ភ្នំពេញ៖ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ជំរុញឱ្យសភាពាណិជ្ជកម្មចិនម៉ាឡេស៊ី សហការលើវិស័យសក្តានុពល រួមមាន ការអភិវឌ្ឍន៍ហេដ្ឋារចនាសម្ព័ន្ធ សេដ្ឋកិច្ចឌីជីថល កសិកម្មប្រកបដោយចីរភាព និងទេសចរណ៍។ នេះបើតាមការចុះផ្សាយរបស់សភាពាណិជ្ជកម្មកម្ពុជា នាថ្ងៃទី១២ ខែសីហា ឆ្នាំ២០២៥។

ក្នុងជំនួបនោះ អ្នកឧកញ៉ា គិត ម៉េង បានបញ្ជាក់ប្រាប់គណៈប្រតិភូសភាពាណិជ្ជកម្មចិនម៉ាឡេស៊ី អំពីកំណើនសេដ្ឋកិច្ចកម្ពុជា និងគោលដៅកម្ពុជាក្នុងការសម្រេចនូវទស្សនវិស័យក្លាយជាប្រទេសមានចំណូលខ្ពស់ត្រឹមឆ្នាំ ២០៥០ ដោយផ្អែកលើកត្តាជំរុញនានារួមមាន៖ កម្លាំងពលកម្មវ័យក្មេងនិងជំនាញ បរិយាកាសវិនិយោគអំណោយផល និងគោលនយោបាយយុទ្ធសាស្ត្ររបស់រាជរដ្ឋាភិបាល។

កិច្ចប្រជុំ ដើម្បីពិភាក្សាអំពីគម្រោងសហការ និងលើកកម្ពស់កិច្ចសហប្រតិបត្តិការធុរកិច្ចទ្វេភាគី ក្នុងអំឡុងពេលដែលគណៈប្រតិភូសភាពាណិជ្ជកម្មចិនម៉ាឡេស៊ី បំពេញទស្សនកិច្ចនៅកម្ពុជាចាប់ពីថ្ងៃទី១១ ដល់ថ្ងៃទី១៣ ខែសីហា ឆ្នាំ ២០២៥នេះ បញ្ចប់ទៅដោយជោគជ័យដោយធុរជនកម្ពុជាម៉ាឡេស៊ី បានជួបប្រាស្រ័យទាក់ទងគ្នាដោយផ្ទាល់ និងពិនិត្យលទ្ធភាពសហប្រតិបត្តិទៅតាមវិស័យរៀងៗខ្លួន។ សភាពាណិជ្ជកម្មកម្ពុជា បន្តជំរុញកាលានុវត្តភាព និងជួយសម្រួលដល់ការបណ្តាក់ទុនវិនិយោគនៅ កម្ពុជា និង ការរីចម្រើនរបស់វិនិយោគិនអន្តរជាតិ៕