ភ្នំពេញ៖ កិច្ចសហប្រតិបត្តិការវាងប្រទេសកម្ពុជា និងចិនក្នុងការអភិវឌ្ឍផលិតផលហិរញ្ញវត្ថុពាក់ព័ន្ធ គឺដើម្បីជំរុញប្រតិបត្តិការទូទាត់ជាប្រាក់រៀល និងប្រាក់យ៉ន់ សម្រាប់ពាណិជ្ជកម្មឆ្លងដែនទ្វេភាគី។ នេះបើតាមការលើកឡើងរបស់ឯកឧត្តម រ័ត្ន សុវណ្ណនរៈ ទេសាភិបាលរង ធនាគារជាតិនៃកម្ពុជា នាថ្ងៃទី៦ ខែមិថុនា ឆ្នាំ២០២៥។

ក្នុងសុន្ទរកថាបើក «វេទិកាអន្តរជាតូបនីយកម្មប្រាក់យ៉ន់ ឆ្នាំ២០២៥» នៅតំបន់រដ្ឋបាលពិសេសហុងកុង ប្រទេសចិន ឯកឧត្តម រ័ត្ន សុវណ្ណនរៈ ក៏បានបញ្ជាក់ពីតួនាទីនៃប្រាក់យ៉ន់ ក្នុងការសម្រួលប្រតិបត្តិការទូទាត់ និងពាណិជ្ជកម្មសម្រាប់វិនិយោគិនអន្តរជាតិ ដែលសមស្របនឹងក្របខ័ណ្ឌរបស់ប្រទេសចិនក្នុងពាណិជ្ជកម្មអន្តរជាតិ។

ជាមួយគ្នានេះ ឯកឧត្តមទេសាភិបាលរង ធនាគារជាតិនៃកម្ពុជា ក៏បានកត់សម្គាល់នូវកិច្ចខិតខំប្រឹងប្រែងរួមគ្នាក្នុងតំបន់ ក្នុងការលើកកម្ពស់ការទូទាត់ពាណិជ្ជកម្មឆ្លងដែនទ្វេភាគី ដោយប្រើរូបិយប័ណ្ណក្នុងស្រុករៀងៗខ្លួនផងដែរ។ នេះបើតាមការចុះផ្សាយរបស់ធនាគារជាតិនៃកម្ពុជា នាថ្ងៃទី០៦ ខែមិថុនា ឆ្នាំ២០២៥៕