ភ្នំពេញ៖ ក្រសួងទេសចរណ៍ នឹងផ្តល់កិច្ចសហប្រតិបត្តិការជួយផ្សព្វផ្សាយពីការអភិរក្សពូជដំរី​ និងសក្តានុពលទេសចរណ៍បែបអេកូទេសចរណ៍ក្នុងតំបន់ដែលសមាគមកំពុងអភិរក្ស ដើម្បីទាក់ទាញការយល់ដឹង និងចូលរួមពីប្រជាពលរដ្ឋគ្រប់វ័យ និងគ្រប់ទិសទីចូលរួមអភិរក្សសត្វដំរី និងសត្វព្រៃទាំងអស់ ព្រមទាំងការជួយថែរក្សាតំបន់អេកូទេសចរណ៍ដ៏ស្រស់បំព្រងរបស់កម្ពុជានាភាគឥសានជាតំបន់អេកូទេសចរណ៍ប្រកបដោយនិរន្តភាព និងបរិយាប័ន្ន។ នេៈបើតាមការលើកឡើងរបស់ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍។

ក្នុងជំនួបជាមួយឯកឧត្តម ហួត ហាក់ លោកជំទាវ ម៉ែន នារីវុឌ្ឍី អនុប្រធានកិត្តិយសសមាគមមូលនិធិអភិរក្សដំរីខ្មែរ អៃរាវត្តា បានបញ្ជាក់ពីសកម្មភាពរបស់សមាគម ដែលរួមមានការចូលរួមចំណែកក្នុងការចិញ្ចឹមថែទាំអភិរក្សដំរីក្នុងស្រុកដែលនៅសល់ចុងគេបង្អស់ក្នុងខេត្តរតនគិរី និងសមទ្ធិផលដ៏ល្អ គឺអាចបង្កាត់កូនដំរីបាន ដែលបច្ចុប្បន្នសមាគម បានចិញ្ចឹមថែទាំដំរីទាំង៤ ក្បាល ដូចជា ឈ្មោលពីរ ញីមួយ និងកូនដំរីមួយ។

ជាមួយគ្នានេះ សមាគមមូលនិធិអភិរក្សដំរីខ្មែរ ក៏បានចូលរួមចំណែកអភិវឌ្ឍអេកូទេសចរណ៍នៅក្នុងតំបន់ ដោយបានផ្សព្វផ្សាយជូនភ្ញៀវជាតិ និងអន្តរជាតិ ធ្វើដំណើរទេសេរចណ៍កម្សាន្តក្នុងតំបន់ និងមកលេងជាមួយដំរី រួមទាំងការបង្កើតទំនាក់ទំនងផ្ទាល់ជាមួយដំរី ដើម្បីបង្កើតការយល់ដឹងរបស់ពួកគាត់។ ឯកឧត្តម ហួត ហាក់ ក៏បានកោតសរសើរចំពោះកិច្ចខិតខំប្រឹងប្រែងរបស់សមាគម ពិសេសកិច្ចអភិរក្សពូជដំរីក្នុងស្រុកដ៏កម្រ ដែលជាការរួមចំណែកដល់ការបង្កើតនូវផលិតផលទេសចរណ៍ថ្មី និងដែលមានតម្លៃបន្ថែម ស្របតាមគោលនយោបាយរាជរដ្ឋាភិបាលកម្ពុជា៕