ភ្នំពេញ៖ ខេត្ត Shanxi នឹងធ្វើទស្សនកិច្ចនៅខេត្តសៀមរាប ដើម្បីពិភាក្សាអំពីការជំរុញកិច្ចសហប្រតិបត្តិការលើវិស័យទេសចរណ៍ វប្បធម៍ និងការវិនិយោគ ក៏ដូចជាការផ្ដល់អាហារូបករណ៍ដល់សិស្ស និស្សិតខេត្តសៀមរាប ទៅសិក្សានៅខេត្ត Shanxi ប្រទេសចិន។ លោក Wang Hongjin ប្រធានមន្ទីរពាណិជ្ជកម្មខេត្ត Shanxi លើកឡើងដូច្នេះ កាលពីថ្ងៃទី០៦ ខែសីហា ឆ្នាំ២០២៤។

ក្នុងកិច្ចប្រជុំ ដែលធ្វើឡើងនៅសាលប្រជុំសាលាខេត្តសៀមរាប ជាមួយ លោក Wang Hongjin, លោក ង៉ូវ សេងកាក់ អភិបាលរង នៃគណៈអភិបាលខេត្តសៀមរាប មានប្រសាសន៍ស្វាគមន៍ និងគាំទ្រនូវកិច្ចការសហការដើម្បីការអភិវឌ្ឍន៍ខាងលើនេះ។ ជាមួយគ្នានេះ ភាគីទាំងពីរ ក៏បានរំពឹងថា ទំនាក់ទំនងកិច្ចសហប្រតិបត្តិការ និងការផ្លាស់ប្ដូរទៅវិញទៅមក នឹងធ្វើឱ្យមានការអភិវឌ្ឍរួមគ្នាកាន់តែប្រសើរ៕