ភ្នំពេញ៖ ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន​ បញ្ជាក់សាជាថ្មីថា ព័ត៌មានផ្លូវការពីសមរភូមិ គឺមានតែ«ក្រសួងការពារជាតិ» តែមួយប៉ុណ្ណោះ​ ដោយឡែក សម្រាប់អ្នកលេងបណ្តាញសង្គម ក្រុម MMO​ និងអ្នកសារព័ត៌មានអនឡាញ មួយចំនួនបាន ផ្សព្វផ្សាយព័ត៌មានគ្មានប្រភពច្បាស់លាស់ ពីសមរភូមិមុខ ដែលកំពុងស្ថិតក្នុងការអនុវត្តបទឈប់បាញ់ តាំងពីម៉ោង ១២យប់ថ្ងៃទី២៨ ខែកក្កដា​ ជាព័ត៌មានដែលគ្រាន់តែឮ គេថាតៗតាមគ្នា ជាព័ត៌មានមិនអាចយកជាការបានទេ។​

ឯកឧត្តមរដ្ឋមន្រ្តី​ នេត្រ ភក្ត្រា ​សង្កត់ធ្ងន់ថា ការផ្សព្វផ្សាយព័ត៌មាន គ្មានប្រភពច្បាស់លាស់ គ្រាន់តែឭតាមគ្នា ជាកំហុសឆ្គង និងមិនទទួលខុសត្រូវ។ ដូចនេះ ឯកឧត្តមរដ្ឋមន្រ្តី​ ស្នើឱ្យបងប្អូនអត់ធ្មត់ និងរង់ចាំទទួលព័ត៌មានផ្លូវការ ដែលអ្នកនាំពាក្យរាជរដ្ឋាភិបាល អ្នកនាំពាក្យក្រសួងការពារជាតិ និងក្រសួងព័ត៌មានផ្តល់ជាផ្លូវការ ចៀសវាងការច្រឡោត និងភ័យស្លន់ស្លោរ ឬប្រតិកម្មឆ្លើយតបតាមការផ្សព្វផ្សាយព័ត៌មានដែលគ្មានប្រភពច្បាស់លាស់ និងព័ត៌មានដែលគ្រាន់តែឮគេថា។ នេះបើយោងតាមគេហទំព័រផ្លូវការ ឯកឧត្តមរដ្ឋមន្រ្តី​ នេត្រ ភក្ត្រា​ នាថ្ងៃទី២៩ កក្កដា នេះ៕

​​