ភ្នំពេញ៖ ក្រសួងទេសចរណ៍ នឹងរៀបចំព្រឹត្តិការណ៍រត់ប្រណាំងកាត់វាល (Paddy Field Trail Running 2025) ក្នុងគោលបំណងផ្សព្វផ្សាយសកម្មភាពទេសចរណ៍ក្នុងសហគមន៍ នារដូវកាលបៃតង (Green Season) នៅតំបន់គោលដៅទេសចរណ៍វត្តភ្នំរាប និងតំបន់គោលដៅទេសចរណ៍រាជធានីភ្នំពេញ។ ការរៀបចំព្រឹត្តិការណ៍នេះឡើង ក៏ដើម្បីចូលរួមលើកស្ទួយសកម្មភាពសេដ្ឋកិច្ចរបស់ ពលរដ្ឋនៅក្នុងសហគមន៍មូលដ្ឋាន និងជំរុញកំណើនទេសចរផងដែរ។

ព្រឹត្តិការណ៍រត់ប្រណាំងកាត់វាល ដែលសហការរៀបចំដោយក្រសួងទេសចរណ៍ និងគណៈកម្មការរៀបចំកម្មវិធី Paddy Field Trail 2025 នឹងប្រព្រឹត្តទៅ នៅថ្ងៃទី២៥ ខែឧសភា ឆ្នាំ២០២៥ វេលាម៉ោង ៥:០០ នាទីព្រឹក នៅវត្តភ្នំរាប ខណ្ឌព្រែកព្នៅ រាជធានីភ្នំពេញ ក្នុងចម្ងាយ ៥គីឡូម៉ែត្រ។ ជាមួយគ្នានេះ សម្រាប់ការចុះឈ្មោះចូលរួម នឹងទទួលបានអាវយឺត មេដាយអនុស្សាវរីយ៍ ភេសជ្ជៈ និងអាហារសម្រន់ ដោយមិនមានបង់ថវិកានោះទេ ដោយក្រសួងទេសចរណ៍ បានកំណត់អ្នកចូលរួមចំនួន ៣០០នាក់។

សម្រាប់សាធារណជនទាំងអស់ ដែលមានបំណងចូលរួមក្នុងព្រឹត្តិការណ៍ខាងលើ អាចចុះឈ្មោះតាមរយៈ https://forms.gle/QxLja7dsT9qRNJUK6 ត្រឹមថ្ងៃទី២០ ខែឧសភា ឆ្នាំ២០២៥។ នេះបើយោងតាមសេចក្តីប្រកាសរបស់ក្រសួងទេសចរណ៍៕