ភ្នំពេញ៖ ធុរជន ដែលអាចប្រកបអាជីវកម្មនាំចូលមុខទំនិញសាច់បង្កកបាន ត្រូវមានឃ្លាំងរក្សាគុណភាពសាច់បង្កកស្របតាមលក្ខណៈបច្ចេកទេសត្រឹមត្រូវ។ នេះបើតាមសេចក្តីជូនដំណឹង ស្តីពីយន្តការ និងលក្ខណៈវិនិច្ឆ័យនៃការផ្ដល់គុណវុឌ្ឍិលើការនាំចូលមុខទំនិញ «សាច់បង្កក» របស់អគ្គនាយកដ្ឋានគយនិងរដ្ឋាករកម្ពុជា ចេញផ្សាយនាថ្ងៃទី១៩ ខែវិច្ឆិកា ឆ្នាំ២០២៤។

ក្រុមការងារវាយតម្លៃក្រុមហ៊ុនមានគុណវុឌ្ឍិនាំចូលសាច់បង្កក បានឱ្យដឹងថា ក្រុមហ៊ុនដែលចង់នាំចូលសាច់បង្កក គឺត្រូវមានការទទួលស្គាល់ជាមុន ជាក្រុមហ៊ុនមានគុណវុឌ្ឍិ ដោយត្រូវដាក់ពាក្យស្នើសុំមកអគ្គនាយកដ្ឋានគយនិងរដ្ឋាករកម្ពុជា ឬអគ្គនាយកដ្ឋាន សុខភាពសត្វនិងផលិតកម្មសត្វ។ ក្រុមហ៊ុនទាំងនោះ ត្រូវមានកម្មវត្ថុអាជីវកម្មសមស្របដូចជា «នាំចូលសាច់បង្កក ឬមានកម្មវត្ថុអាជីវកម្មពាក់ព័ន្ធនឹងការនាំចូលសាច់»។

ជាមួយគ្នានេះ ក្រុមហ៊ុនដែលអាចនាំចូលសាច់បង្កកបាន ត្រូវមានប្រភពផ្គត់ផ្គង់សាច់បង្កកពីក្រៅប្រទេសច្បាស់លាស់ និងត្រូវមានការធានាអះអាងជាលាយលក្ខណ៍អក្សរថា «នឹងប្រើប្រាស់មធ្យោបាយដឹកជញ្ជូននិងចែកចាយសាច់បង្កក ដែលមានលក្ខណៈបច្ចេកទេសសមស្រប»៕