ភ្នំពេញឰ៖ សហភាពសហព័ន្ធយុវជនកម្ពុជា (ស.ស.យ.ក.) នឹងទៅកាន់ប្រទេសម៉ាឡេស៊ី ដើម្បីទៅទទួល ពានរង្វាន់ អាស៊ាន ASEAN Prize នៅថ្ងៃទី២៥ ខែតុលា ឆ្នាំ២០២៥ ខាងមុខនេះ។ នេះបើតាមការលើកឡើងរបស់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា នាថ្ងៃទី១៧ តុលា។

ឯកឧត្តម ហ៊ុន ម៉ានី លើកឡើងថា ពានរង្វាន់ Asean Prize នេះ គឺជាសក្ខីកម្មនៃការទទួលស្គាល់នូវសកម្មភាពដ៏ថ្លៃថ្លា ដែលកើតចេញពីការខិតខំប្រឹងប្រែងរបស់សមាជិក សមាជិកា របស់ ស.ស.យ.ក គ្រប់រូប ដែលបានចូលរួមយ៉ាងសកម្មក្នុងសកម្មភាពនានាក្រោមទិសស្លោក «យុវជនក្នុងបុព្វហេតុជាតិមាតុភូមិ»។

«ពានរង្វាន់នេះ គឺជាការបង្ហាញពីសង្គមកម្ពុជាមួយដែលតែងតែរួបរួមគ្នា និងមានវត្តមានគ្រប់ទិសទីមិនថាក្នុងកាលៈទេសៈបែបណា នៅតែបន្ដជួយដើម្បីប្រជាជនកម្ពុជា ក្នុងស្មារតីខ្មែរតែមួយរួមគ្នាជាធ្លុងមួយ»។ នេះបើតាមប្រសាសន៍របស់ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា៕