ភ្នំពេញ៖ រដ្ឋបាលខេត្តកំពត គ្រោងរៀបចំពិធីប្រណាំងទូក រយៈពេល២ថ្ងៃ នៅព្រែកកំពង់បាយ(ឆ្នេរកោះស្មៅ) ដើម្បីចូលរួមអបអរសាទរព្រះរាជពិធីបុណ្យអុំទូក អកអំបុក សំពះព្រះខែ និងបណ្តែតប្រទីប។ ពិធីប្រណាំងទូកដែលប្រារព្វធ្វើនៅថ្ងៃទី១០-១១ ខែវិច្ឆិកាខាងមុខនេះ ក៏រៀបចំប្រគុំតន្ត្រី បាញ់កាំជ្រួច និងតាំងពិពរណ៌ភូមិមួយផលិតផលមួយផងដែរ។

រដ្ឋបាលខេត្តកំពតបានចេញសេចក្តីជូនដំណឹងពីការប្រារព្ធពិធីប្រណាំងទូកនេះ ដោយអំពាវនាវដល់សាធារណជន ភ្ញៀវទេសចរជាតិ-អន្តរជាតិ ចូលរួមសម្សាន្តសប្បាយឱ្យបានច្រើនកុះករ ជាមួយនឹងស្មាតីចូលរួមថែរក្សាអនាម័យបរិស្ថានពេលដែលមកលេងកម្សាន្តនេះផងដែរ៕