ភ្នំពេញ៖ គម្រោងសាងសង់ស្ពានមិត្តភាពកម្ពុជា-កូរ៉េ តភ្ជាប់ពីផ្សាររាត្រីឆ្ពោះទៅតំបន់អរិយក្សត្រ ដែលតម្លៃគម្រោងកិច្ចសន្យាចំនួន ២៣៥លានដុល្លារ នឹងបើកការដ្ឋានសាងសង់នៅរយៈពេល១០ខែទៀត គឺក្នុងខែមិថុនា ឆ្នាំ២០២៥។ នេះបើតាមការចុះផ្សាយនៅគេហទំព័រហ្វេសប៊ុករបស់ លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន នាថ្ងៃទី២៩ ខែសីហា ឆ្នាំ២០២៤។

លោក ផន រឹម បានបញ្ជាក់ឱ្យដឹងថា៖ «ចំពោះផលប៉ះពាល់បរិស្ថាន និងសង្គម(ESIA)របស់គម្រោងសាងសង់នេះ បានបើកកិច្ចប្រជុំពិនិត្យបិទបញ្ចប់របាយការណ៍ចុងក្រោយ និងបានឯកភាពលើរបាយការណ៍រួចរាល់ហើយ ដែលនេះ គឺជាផ្នែកចម្បងដើម្បីបើកផ្លូវសម្រាប់ដំណើរការបើកការដ្ឋានសាងសង់ស្ពានមិត្តភាពនេះ»។ អ្នកនាំពាក្យក្រសួងសាធារណការ បានបន្ថែមថា ការគូសប្លង់សាងសង់លម្អិត នៃគម្រោង(Details Design) របស់ស្ពានមិត្តភាពកម្ពុជា-កូរ៉េ គឺដើម្បីភាពប្រាកដនិយមពេលដែលគម្រោងចាប់ផ្តើមសាងសង់ នឹងទទួលបានលទ្ធផលល្អប្រសើរតាមការគ្រោងទុក ពិសេសជាផ្នែកដ៏សំខាន់នៃដំណាក់កាលបន្ទាប់ផងដែរ។

គម្រោងសាងសង់ស្ពានមិត្តភាពកម្ពុជា-កូរ៉េ ជាហិរញ្ញប្បទានរបស់ធនាគាអាហរ័ណ-នីហរ័ណ នៃសាធារណរដ្ឋកូរ៉េ ដែលមានកិច្ចសន្យាសាងសង់មានរយៈពេល ៦០ខែ និងជាប្រភេទស្ពានខ្សែកាប(Two cable stayed bridges)មានប្រវែងសរុប ២,៣៧៥ម៉ែត្រ, ទទឹង ២៧,៥ម៉េត្រ, ប្រវែងផ្លូវក្បាលស្ពានសរុប(Approach road) ១,១៧៤ម៉ែត្រ ក្នុងនោះទទឹងផ្លូវ ២២,៥ម៉ែត្រ៕