ភ្នំពេញ៖ ក្រុមហ៊ុន ភ្នំពេញស៊ីធី សេនធ័រ (Phnom Penh City Center) បានផ្តល់ថវិការចំនួន ៥ម៉ឺនដុល្លារ ដើម្បីរួមចំណែកជាមួយរាជរដ្ឋាភិបាលតាមរយៈក្រសួងអប់រំ យុវជន និងកីឡា ក្នុងការជួសជុល និងសាងសង់ឡើងវិញនៅអគារសិក្សាដែលទទួលរងការប៉ះពាល់ដោយសង្គ្រាម។ ជាមួយគ្នានេះ ក្រុមហ៊ុនភ្នំពេញ ស៊ីធី សេនធ័រ បានរួមចំណែកជាមួយរាជរដ្ឋាភិបាលក្នុងការកសាងហេដ្ឋារចនាសម្ព័ន្ធឡើងវិញ ដើម្បីជួយសម្រួលផលលំបាកដោយសារសង្រ្គាម និងផ្តល់ឱកាសដល់សិស្សានុសិស្សក្នុងការបន្តការសិក្សា។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអរគុណដល់ក្រុមហ៊ុនភ្នំពេញ ស៊ីធី សេនធ័រ ចំពោះការចូលរួមចំណែកជួយគាំទ្រដល់វិស័យអប់រំនៅកម្ពុជា និងបានចែករំលែកពីបច្ចុប្បន្នភាពស្ថានភាពនៅតំបន់ព្រំដែនជាមួយប្រទេសថៃ ដែលមកដល់ពេលនេះ មិនទាន់ត្រឡប់ទៅរកប្រក្រតីភាព ដែលធ្វើឱ្យក្រុមការងារក្រសួង មិនទាន់អាចចូលទៅសាងសង់ និងជួសជុលអគារសិក្សាដែលរងការខូតខាតដោយសង្គ្រាមនៅឡើយ។

ទន្ទឹមនឹងនេះ ក្រសួងអប់រំ យុវជន និងកីឡា បានរៀបចំរួចរាល់នូវក្រុមការងារជំនាញ និងផែនការ ដើម្បីស្តារសាលារៀននៅតាមបណ្តោយព្រំដែនឡើងវិញ ដោយប្រើប្រាស់កញ្ចប់ថវិការបស់ក្រសួង រួមជាមួយការជួយឧបត្ថម្ភគាំទ្រពីសំណាក់សប្បុរសជននានា ដែលក្នុងនោះមានកញ្ចប់ថវិការបស់ក្រុមហ៊ុនភ្នំពេញ ស៉ីធី សេនធ័រ ផងដែរ។ ក្រសួងបានចាត់ក្រុមការងារចុះពិនិត្យផ្ទាល់ដល់សាលារៀនដែលរងប៉ះពាល់ ដោយជាបឋមនឹងចាប់ផ្តើមពីការបោសសម្អាតមីននៅតាមកន្លែងដែលត្រូវសាងសង់ និងជួសជុល។ តាមការគ្រោងទុក ក្រសួងនឹងសម្របសម្រួលឱ្យមានការបើកបវេសនកាលចូលរៀននៅដើមខែវិច្ឆិកា ឆ្នាំ២០២៥ខាងមុខនេះ នៅតាមទីទួលសុវត្ថិភាពដែលអំណោយផលសម្រាប់ការរៀន និងបង្រៀន ដើម្បីធានាបានថាសិស្សានុសិស្សអាចបន្តទទួលបានការអប់រំប្រកបដោយគុណភាព សមធម៌ និងបរិយាបន្ន៕