ភ្នំពេញ៖ ក្រសួងពាណិជ្ជកម្ម រៀបចំកិច្ចប្រជុំបច្ចេកទេសលើកទី១ នៃក្រុមការងារបច្ចេកទេស សិក្សាស្រាវជ្រាវ និងរៀបចំសេចក្តីព្រាងគោលនយោបាយស្វាយកម្ពុជា។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី១៦ ខែកញ្ញា ឆ្នាំ២០២៥។

កិច្ចប្រជុំ ដែលធ្វើឡើង នៅទីស្តីការក្រសួងពាណិជ្ជកម្មនេះ មានគោលបំណងប្រកាសផ្សព្វផ្សាយពីសេចក្ដីសម្រេចស្ដីពីការបង្កើតក្រុមការងារបច្ចេកទេស ព្រមទាំងពិនិត្យ និងផ្តល់យោបល់ទៅលើការកំណត់ពេលវេលា និងផែនសកម្មភាព នៃការរៀបចំសេចក្តីព្រាងគោលនយោបាយស្វាយកម្ពុជា សំដៅជំរុញអភិវឌ្ឍន៍ និងលើកកម្ពស់វិស័យស្វាយកម្ពុជា។

កិច្ចប្រជុំពិភាក្សាខាងលើនេះ ដឹកនាំដោយ ឯកឧត្តម វ៉ា រុតសាន រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារបច្ចេកទេសដើម្បីសិក្សា ស្រាវជ្រាវ និងរៀបចំសេចក្តីព្រាងគោលនយោបាយស្វាយកម្ពុជា និងមានការចូលរួមពី ឯកឧត្តមអនុប្រធានក្រុមការងារ សមាជិក សមាជិកា តំណាងវិស័យឯកជន និងដៃគូអភិវឌ្ឍន៍ ជាច្រើនរូបផងដែរ៕