ភ្នំពេញ៖ ក្រសួងពាណិជ្ជកម្ម នឹងរៀបចំវេទិកាធុរកិច្ច វិនិយោគ និងទេសចរណ៍ នៅថ្ងៃទី១៧ ខែកញ្ញា ឆ្នាំ២០២៥ ក្នុងគោលបំណងផ្សព្វផ្សាយ និងជំរុញបរិយាកាសធុរកិច្ច វិនិយោគ និង ទេសចរណ៍នៅកម្ពុជា នៅពិព័រណ៍ចិន-អាស៊ាន លើកទី២២ (The 22nd China-ASEAN Expo)។ នេះបើតាមការចុះផ្សាយរបស់ក្រសួងពាណិជ្ជកម្ម នាថ្ងៃទី២២ ខែសីហា ឆ្នាំ២០២៥។

ពិព័រណ៍ចិន-អាស៊ាន លើកទី២២ នេះ គឺចាប់ពីថ្ងៃទី១៧-២១ ខែកញ្ញា ឆ្នាំ២០២៥ នៅមជ្ឈមណ្ឌលសន្និសីទនិងពិព័រណ៍អន្តរជាតិ ទីក្រុងណាននីង តំបន់ស្វយ័តក្វាងស៊ី ប្រទេសចិន។ ជាមួយគ្នានេះ ក្រសួងពាណិជ្ជកម្ម ក្នុងនាមជាដៃគូសហការរៀបចំ បានអំពាវនាវពាណិជ្ជករ និងសាធារណជន ដែលមានចំណាប់អារម្មណ៍ចូលរួម និងមានបំណងចង់ចុះអនុស្សរណៈនៃការយោគយល់គ្នា ឬកិច្ចព្រមព្រៀងជាមួយដៃគូអាជីវកម្មរបស់ខ្លួនក្នុងវេទិកាខាងលើ អាចទំនាក់ទំនងចូលរួមចាប់ពីថ្ងៃផ្សាយដំណឹងនេះរហូតដល់ថ្ងៃទី៣ ខែកញ្ញា ឆ្នាំ២០២៥ ជាកំណត់។

សម្រាប់ព័ត៌មានបន្ថែម សាធារណជន អាចទំនាក់ទំនងនាយកដ្ឋានអភិវឌ្ឍន៍ទីផ្សារ អគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម តាមរយៈទូរស័ព្ទលេខ +៨៥៥ ៩៩ ៩៥៤ ៥៦៥ / +៨៥៥ ៧៨ ៦៥៦ ៥០៨ ឬអ៊ីម៉ែល [email protected] / [email protected] ៕