ភ្នំពេញ៖ ក្រុមហ៊ុនវិនិយោគចំនួន៥ របស់ប្រទេសចិន ដែលដឹកនាំដោយលោក Tang Choayang ប្រធានក្រុមហ៊ុន Guangwang Integrated Housing Co., Ltd ដែលជាក្រុមហ៊ុនវិនិយោគផ្នែកសំណង់លំនៅឋាន ផ្ទះចល័ត និងផ្ទះលំហែកាយ មករកឱកាសវិនិយោគនៅខេត្តព្រះសីហនុ ដើម្បីពង្រីកទីផ្សារក្នុងតំបន់។ នេះបើតាមការចុះផ្សាយរបស់ រដ្ឋាបាលខេត្តព្រះសីហនុ នាថ្ងៃទី១៤ ខែមិថុនា ឆ្នាំ២០២៥។

ក្រុមហ៊ុនរបស់ចិនទាំង៥ បានសម្រេចចិត្តមកសិក្សាដោយផ្ទាល់ ដើម្បីស្វែងយល់ឱ្យកាន់តែច្បាស់បន្ថែមទៀតក្នុងខេត្តព្រះសីហនុ បន្ទាប់ពីក្រុមហ៊ុនបានចូលរួមវេទិកាជំរុញវិនិយោគខេត្តព្រះសីហនុ នៅខេត្តអានហ៊ួយ សាធារណរដ្ឋប្រជាមានិតចិន កាលពីថ្ងៃទី៧ ខែមិថុនា ឆ្នាំ២០២៥ កន្លងទៅ។ ទាំងនេះ គឺជាលទ្ធផលប្រកបដោយផ្លែផ្កា បន្ទាប់ពីវេទិកាជំរុញការវិនិយោគខេត្តព្រះសីហនុ នៅប្រទេសចិន ដើម្បីផ្សព្វផ្សាយ និងទាក់ទាញវិនិយោគមកកាន់កម្ពុជាបន្ថែម។

គួរបញ្ជាក់ថា តាមរយៈជំនួបរវាង ឯកឧត្តមម៉ាង ស៊ីណេត អភិបាលខេត្តព្រះសីហនុ ជាមួយឯកឧត្តមអភិបាលខេត្តជាំងស៊ូ របស់ចិន កាលពីថ្ងៃទី៧ ខែមិថុនា ឆ្នាំ២០២៥ កន្លងទៅ អភិបាលខេត្តជាំងស៊ូ បានបញ្ជាក់ថា ឯកឧត្តម បានណែនាំដល់មន្ទីរពាណិជ្ជកម្មខេត្តជាំងស៊ូ ឱ្យដឹកនាំប្រតិភូអ្នកវិនិយោគចិនចំនួន៥០ក្រុមហ៊ុន មកធ្វើទស្សនកិច្ចសិក្សាស្វែងយល់ពីឱកាសវិនិយោគនៅខេត្តព្រះសីហនុ នាពេលឆាប់ៗខាងមុខនេះផងដែរ៕