ភ្នំពេញ៖ គម្រោងវិនិយោគចំនួន៧ ដែលមានទុនវិនិយោគប្រមាណជិត ២៤៨លានដុល្លារ ត្រូវបានក្រុមប្រឹក្សាអភិវឌ្ឍន៍កម្ពុជា (CDC) រៀបចំកិច្ចប្រជុំច្រកចេញចូលតែមួយ ដើម្បីពិនិត្យពិភាក្សាលើសំណើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់។

តាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា គម្រោងវិនិយោគទាំង៧នេះ បានបោះទីតាំងនៅរាជធានីភ្នំពេញ កំពង់ស្ពឺ កំពង់ឆ្នាំង និងពោធិ៍សាត់ និងអាចបង្កើតការងារបានចំនួន ២,៦ពាន់កន្លែង ដោយមានមុខសញ្ញាវិនិយោគក្នុងវិស័យឧស្សាហកម្មចំនួន ៤គម្រោង ដូចជាផលិតថ្មម៉ាប ផលិតពិល កែច្នៃស្បែក និងផលិតប្រដាប់ប្រដារ និងគ្រឿងសង្ហារឹមក្មេង។

ចំពោះគម្រោង ៣ផ្សេងទៀត គឺមានមុខសញ្ញាវិនិយោគលើវិស័យហេដ្ឋារចនាសម្ព័ន្ធ ដែលជាគម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះអាទិត្យអានុភាព ២០មេហ្គាវ៉ាត់ ជាមួយប្រព័ន្ធផ្ទុកថាមពលអគ្គិសនីខេត្តពោធិ៍សាត់, គម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលពន្លឺព្រះអាទិត្យអានុភាព៣០០មេហ្គាវ៉ាត់ និងគម្រោងបង្កើតផែស្ងួត។ គួរបញ្ជាក់ថា កិច្ចប្រជុំ កាលពីថ្ងៃទី១២ ខែមីនា ឆ្នាំ២០២៥ បានធ្វើឡើងក្រោមអធិបតីភាព ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា និងមានការចូលរួមពីសំណាក់តំណាងក្រសួង ស្ថាប័ន និងរដ្ឋបាលរាជធានី ខេត្តពាក់ព័ន្ធ៕