ភ្នំពេញ៖ លោកបណ្ឌិត Carlos Felipe Jaramillo អនុប្រធានធនាគារពិភពលោក ទទួលបន្ទុកតំបន់អាស៊ីបូព៌ា និងប៉ាស៊ីហ្វិក បញ្ជាក់ជាថា ធនាគារពិភពលោក ត្រៀមខ្លួនជានិច្ចដើម្បីបន្តសហការ និងចូលរួមជាមួយកម្ពុជា ដើម្បីជំរុញការសម្រេចទិសដៅរបស់កម្ពុជា ឆ្នាំ២០៥០។

ក្នុងឱកាសជួបជាមួយសម្តេចធិបតី ហ៊ុន ម៉ាណែត កាលពីថ្ងៃទី២៦ ខែតុលា ឆ្នាំ២០២៥ លោកបណ្ឌិត Carlos Felipe Jaramillo បានបង្ហាញពីបំណងចង់ស្វែងយល់បន្ថែមអំពីវិស័យអាទិភាពរបស់ រាជរដ្ឋាភិបាលកម្ពុជា ក្នុងគោលដៅឈានទៅសម្រេចបាននូវចក្ខុវិស័យកម្ពុជា ឆ្នាំ២០៥០។ លោកបណ្ឌិត ក៏បានវាយតម្លៃខ្ពស់ ចំពោះមាគ៌ាច្បាស់លាស់ប្រកបដោយមហិច្ឆតារបស់រាជរដ្ឋាភិបាលកម្ពុជា ក្នុងការឈានទៅសម្រេចបាននូវចក្ខុវិស័យកម្ពុជា ឆ្នាំ២០៥០ ខណៈដែលពិភពលោកពោរពេញទៅដោយភាពមិនច្បាស់លាស់ និងបញ្ហាប្រឈមផងដែរ។

ជាមួយគ្នានេះ សម្ដេចធិបតីនាយករដ្ឋមន្រ្តី បានគូសបញ្ជាក់ថា កម្ពុជា បានដាក់ចេញ និងកំពុងអនុវត្តនូវយុទ្ធសាស្ត្របញ្ចកោណ-ដំណាក់កាលទី១ ដែលផ្ដោតសំខាន់លើ៖ វិស័យអប់រំ, វិស័យហេដ្ឋារចនាសម្ព័ន្ធ,ការធានាបាននូវការផ្គត់ផ្គង់ថាមពលកកើតឡើងវិញ, បច្ចេកវិទ្យា និងឌីជីថលូបនីយកម្ម និងការធានាបាននូវកំណើន និងការអភិវឌ្ឍប្រកបដោយចីរភាព៕