ភ្នំពេញ៖ ក្នុងឆមាសទី១ ឆ្នាំ២០២៥ កម្ពុជាទទួលបានភ្ញៀវទេសចរណ៍អន្តរជាតិ ៣,៤ លាននាក់កើនឡើង ៦,២% នឹងរំពឹងថា នឹងទទួលបានភ្ញៀវអន្តរជាតិសរុបប្រមាណ ៧,២ ទៅ ៧,៥ លាននាក់ នៅដំណាច់ឆ្នាំ២០២៥នេះ។

ទន្ទឹមនឹងនេះ បន្ទាប់ពីការដាក់ឱ្យដំណើរការ អាកាសយានដ្ឋានអន្តរជាតិតេជោ កម្ពុជា នឹងអាចទទួលអ្នកដំណើរបានរហូតដល់ ១៣ លាននាក់ ក្នុងមួយឆ្នាំក្នុងដំណាក់កាលទី១។

យោងតាមរបាយការណ៍ របស់ធនាគារជាតិនៃកម្ពុជា បន្ទាប់ពីការដាក់ឱ្យដំណើរការ អាកាសយានដ្ឋានអន្តរជាតិតេជោ ក្នុងដំណាក់កាលទី១ ចំណូលទេសចរណ៍អន្តរជាតិត្រូវបានប៉ាន់ស្មានថា ទទួលបានចំនួន ១,៩ ប៊ីលានដុល្លារ កើន ៩,១% ធៀបនឹងឆមាសដូចគ្នាឆ្នាំមុន និង ចំណូលពីការលក់បណ្ណចូលទស្សនារមណីយដ្ឋានអង្គរទទួលបាន ២៦,៣ លានដុល្លារអាមេរិក ដែលបានកើន ៨%។

ជាមួយគ្នានេះ ទេសចរក្នុងស្រុកនឹងបន្តកើន ៥០,៣% ដល់ ១៤,៦ លាននាក់។ រាជធានីភ្នំពេញឈរ នៅលំដាប់ទី១ ជាតំបន់ដែលទទួលទេសចរច្រើនជាងគេដែលមានសមាមាត្រ ៣៨,៤% នៃទេសចរក្នុងស្រុកសរុប និងទី២តំបន់ឆ្នេរ (៣៦,៦%) ខណៈខេត្តសៀមរាបឈរនៅលំដាប់ទី៣ (១៦%) និង តំបន់អេកូទេសចរណ៍ឈរនៅលំដាប់ទី៤ (១,៩%)៕