ភ្នំពេញ៖ ក្រសួងពាណិជ្ជកម្ម ហាមឃាត់ការប្រើប្រាស់ម៉ាកដែលដូច ឬត្រាប់តាម ឬក៏មានចំណុចណាមួយដូចសញ្ញាជាតិ ទង់ជាតិ និងនិមិត្តរូបនៃកម្ពុជា ដោយគ្មានការអនុញ្ញាត ធ្វើឱ្យប៉ះពាល់សណ្តាប់ធ្នាប់សាធារណៈ សីលធម៌ ឬទំនៀមទម្លាប់ប្រពៃណីល្អរបស់ជាតិ។ នេះបើយោងតាមសេចក្តីជូនដំណឹងរបស់ក្រសួងពាណិជ្ជកម្ម នាថ្ងៃទី២៧ ខែមីនា ឆ្នាំ២០២៤។

តាមសេចក្តីជូនដំណឹងរបស់ក្រសួងពាណិជ្ជកម្ម បានបញ្ជាក់ថា ម៉ាកដែលមិនអាចចុះបញ្ជីបាន គឺជាម៉ាកដែលដូចគ្នា ឬត្រាប់តាម ឬក៏មានចំណុចណាមួយដូច សញ្ញាជាតិ ទង់ជាតិ និងនិមិត្តរូបផ្សេងៗ ឈ្មោះ ឬឈ្មោះសង្ខេប ឬអក្សរកាត់នៃឈ្មោះឬសញ្ញា ឬត្រាជាផ្លូវការ ដែលអនុម័តដោយរដ្ឋណាមួយ អង្គការអន្តររដ្ឋាភិបាល ឬអង្គការដែលបង្កើតដោយអនុសញ្ញាអន្តរជាតិមួយ លើកលែងតែមានការអនុញ្ញាតពីអាជ្ញាធរមានសមត្ថកិច្ចនៃរដ្ឋ ឬអង្គការនោះ។

ការហាមឃាត់ប្រើប្រាស់សញ្ញាជាតិ ទង់ជាតិ និងនិមិត្តរូបទាំងនោះ មានជាប្រភេទសត្វ និងរុក្ខជាតិ ដែលជានិមិត្តរូបនៃប្រទេសកម្ពុជា រួមមាន៖ សត្វគោព្រៃ សត្វត្រយ៉ង អណ្ដើកសរសៃ(អណ្ដើកហ្លួង) ត្រីគល់រាំង ដើមត្នោត ផ្ការំដួល និងផ្លែចេកពងមាន់ ដែលជានិមិត្តរូបរបស់ព្រះរាជាណាចក្រកម្ពុជា៕