ភ្នំពេញ៖ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និងក្រុមអ្នកវិនិយោគឥណ្ឌានៅកម្ពុជា ដឹកនាំដោយឧកញ៉ា គីរ៉ាន់ គូម៉ា រ៉េដឌី (Kiran Kumar Reddy) តំណាងសហគមន៍ឥណ្ឌានៅកម្ពុជា ពិភាក្សា សម្របសម្រួល និងទទួលធាតុចូលបន្ថែមពីអ្នកវិនិយោគឥណ្ឌានៅកម្ពុជា សំដៅពិនិត្យឡើងវិញអំពីលទ្ធភាពនៃការសម្រួល និតិវិធីនៃការធ្វើដំណើរចូល-ចេញកម្ពុជា សម្រាប់បណ្តាប្រទេសអាស៊ីខាងត្បូង ដូចជា ប្រទេសឥណ្ឌា ប៉ាគីស្ថាន នេប៉ាល់និងបង់ក្លាដេស ជាដើម។

កម្មវិធី ដែលរៀបចំឡើងនាថ្ងៃទី១៣ ខែមករា ឆ្នាំ២០២៦ នេះ ត្រូវបានផ្តល់អនុសាសន៍ពីសម្ដេចធិបតី ហ៊ុន ម៉ាណែត ដោយមានការអញ្ជើញចូលរួមផងដែរពីថ្នាក់ដឹកនាំក្រសួងទេសចរណ៍, ឯកឧត្តមឧត្តមសេនីយ៍ឯក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍, ឯកឧត្តម ប៊ុន ផេង អភិបាលរងនៃគណៈ អភិបាលខេត្តកណ្តាល និងមន្រ្តីជំនាញសរុប ១៣រូប៕