ភ្នំពេញ៖ ស្ថានីយទូរទស្សន៍អន្តរជាតិ TV5 Monde ដ៏ធំ និងផ្សាយដល់ជាង ២០០តំបន់ជុំវិញពិភពលោកដែលមានទស្សនិកជនជាង ៤២១លាននាក់ នឹងមកថតខ្សែភាពយន្តឯកសារស្តីពី «ការរីកចម្រើនរុងរឿងរបស់កម្ពុជា» ដោយបង្ហាញពីសក្តានុពលទេសចរណ៍កម្ពុជាដល់ប្រជាជនជុំវិញពិភពលោក។

ក្នុងជំនួបជាមួយលោក Michaël Darmon និងលោក Yves Derai អ្នកកាសែត ផលិតករ និងអ្នកនិពន្ធរបស់ TV5 Monde កាលពីថ្ងៃទី១៦ ខែវិច្ឆិកា ឆ្នាំ២០២៥ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានបញ្ជាក់ថា ក្រសួងទេសចរណ៍ បានត្រៀមជាស្រេច ក្នុងការផ្តល់កិច្ចសហការជាមួយផលិតករលើគម្រោងដ៏មានសារសំខាន់ និងជាប្រយោជន៍ដល់ប្រជាជនកម្ពុជាផង និងប្រជាជនពិភពលោក។

រដ្ឋមន្រ្តីក្រសួងទេសចរណ៍ បានបញ្ជាក់ថា គម្រោងនេះ គឺនឹងបង្ហាញពីសក្តានុពលទេសចរណ៍ដ៏សម្បូរបែប សម្បតិ្តបេតិកភណ្ឌដ៏មានតម្លៃមិនអាចកាត់ថ្លៃបាន អច្ឆរិយនៃរាជធានីភ្នំពេញជាមួយទន្លេ៤ប្រសព្វគ្នា បដិសណ្ឋារកិច្ចដ៏កក់ក្តៅ និងល្បីល្បាញ «ស្នាមញញឹមកម្ពុជា» ជាពិសេសគឺកត្តាសុខសន្តិភាព សុវត្ថិភាព ការរីកចម្រើនគ្រប់វិស័យដែលប្រទេសកម្ពុជាកំពុងមាននាពេលបច្ចុប្បន្ន។

លោក Michaël Darmon និងលោក Yves Derai បានលើកឡើងថា ខ្សែភាពយន្តខាងលើ នឹងត្រូវចាក់បញ្ចាំងក្នុងអំឡុងកិច្ចប្រជុំកំពូលអង្គការបណ្តាប្រទេសនិយាយភាសាបារាំងលើកទី២០ (ហ្រ្វង់កូហ្វូនី) នាខែវិច្ឆិកា ឆ្នាំ២០២៦ នៅខេត្តសៀមរាប ខាងមុខនេះ៕