ភ្នំពេញ៖ លោកឧកញ៉ា តែ តាំងប៉ ប្រធានក្រុមប្រឹក្សាភិបាលនៃសម្ព័ន្ធសមាគមសហគ្រាសធុនតូច និងមធ្យមកម្ពុជ​ បានលើកឡើង​ថា ​សម្ព័ន្ធសមាគម សហគ្រាសធុនតូច និងមធ្យម (SMEs) កម្ពុជា កំពុងចូលរួមអភិវឌ្ឍន៍វិស័យសហគ្រាសធុនតូច និងមធ្យមនៅកម្ពុជា បង្កើននូវផលិតភាព ស្តង់ដារ ការច្នៃប្រឌិត និងនវានុវត្តន៍ នៅក្នុងខ្សែច្រវាក់ផលិតកម្ម កាន់តែរីកចម្រើនឈានទៅរកការប្រកួតប្រជែងលើទីផ្សារជាសាកល។

ក្នុងសិក្ខាសាលាស្តីពី ប្រព័ន្ធគ្រប់គ្រងគុណភាពចំណីអាហារសម្រាសហគ្រាសធុនតូច និងមធ្យម​ នៅ​ខេត្ត​កំពង់ចាម​ លោកឧកញ៉ា តែ តាំងប៉ បានលើកទឹកចិត្តឱ្យសហគ្រាសទាំងអស់ ត្រូវខិតខំអភិវឌ្ឍផលិតផលរហូតឈានទៅរកការនាំចេញ និងបង្កើននូវភាពជឿជាក់លើគុណភាពរបស់ផលិតផលខ្មែរកាន់តែច្រើនឡើង។

ជាមួយគ្នានេះ ឯកឧត្តម ចាន់ រ៉ាន់ អភិបាលរងខេត្តកំពង់ចាម បានបញ្ជាក់ថា តាមរយៈសិក្ខាសាលានេះ នឹងផ្តល់ឱកាសក្នុងការចងក្រងបណ្តាញសហគ្រាស និងជាឱកាសនៃការផ្លាស់ប្តូរយោបល់ បទពិសោធ និងការបង្កើតបង្កើនទំនាក់ទំនងបណ្តាញរវាងសហគ្រិនក្នុងខេត្តកំពង់ចាម និងសហគ្រិននានាដែល អាចជួបគ្នាដោយផ្ទាល់ ក៏ដូចជាឱ្យសម្ព័ន្ធសមាគមសហគ្រាសធុនតូច និងមធ្យមកម្ពុជា បានដឹងអំពីបញ្ហាដែលកើតមានឡើងក្នុងសហគ្រាសនីមួយៗ ដើម្បីប្រមូលផ្តុំជាឯកសារ នឹងរកដំណោះស្រាយសមស្របជូនម្ចាស់សហគ្រាស៕