ភ្នំពេញ៖ ធនាគារ ហុង លីអុង (ខេមបូឌា) ភីអិលស៊ី នឹងពង្រីកប្រតិបត្តិការ ដើម្បីគាំទ្រសហគ្រាសនៅកម្ពុជាក្នុងវិស័យសក្តានុពលមួយចំនួនដូចជា ឧស្សាហកម្មកែច្នៃម្ហូបអាហារ កសិកម្ម និងផលិតផលកែច្នៃផ្សេងៗទៀត។ នេះបើតាមការបញ្ជាក់របស់លោក Leong Wai Mun អគ្គនាយកធនាគារ ហុង លីអុង ក្នុងជំនួបជាមួយលោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា កាលពីថ្ងៃទី២០ ខែតុលា ឆ្នាំ២០២៥។

ក្នុងជំនួបនេះ លោក Leong Wai Mun លើកឡើងថា ធនាគារ ហុង លីអុង ប៊ើហាដ នៅប្រទេសម៉ាឡេស៊ី ដែលជាបុត្រសម្ព័ន្ធរបស់ធនាគារ ហុង លីអុង ដែលបានមកទស្សនកិច្ចកម្ពុជា ដើម្បីស្វែងរកឱកាសវិនិយោគក្នុងវិស័យសុខាភិបាល និងវិស័យផ្សេងៗទៀតផងដែរ ព្រមទាំងលើកសសើរពីការវិវត្តវិជ្ជមាននៃហេដ្ឋារចនាសម្ព័ន្ធនៅកម្ពុជា ជាពិសេសដំណើរការអាកាសយាន្ដដ្ឋានអន្តរជាតិតេជោ។

ជាមួយគ្នានេះ លោកជំទាវ ជា សិរី បានអបអរសាទរចំពោះវឌ្ឍនភាពប្រតិបត្តិការរបស់ធនាគារនាពេលកន្លងមក និងលើកទឹកចិត្តឱ្យមានការពង្រីកប្រតិបត្តិការថែមទៀត។ លោកជំទាវ ជា សិរី ក៏បានបញ្ជាក់អំពីស្ថានភាពសេដ្ឋកិច្ចកម្ពុជា និងការវិវត្តនៃការរៀបចំបទប្បញ្ញត្តិមួយចំនួន ដែលជួយដល់ការពង្រឹងភាពធន់នៃប្រព័ន្ធធនាគារថែមទៀត ព្រមទាំងជំរុញលើកទឹកចិត្តឱ្យមានការចូលរួមមតិយោបល់សម្រាប់ជាធាតុចូល ដើម្បីពង្រឹងប្រសិទ្ធភាពអនុវត្តឱ្យកាន់តែគ្រប់ជ្រុងជ្រោយ៕