ភ្នំពេញ៖ កម្ពុជា និងម៉ាឡេស៊ី ឯកភាពលើលក្ខខណ្ឌ នៃការអនុវត្តការងាររបស់ក្រុមការងាររួម ស្តីពីកិច្ចសហប្រតិបត្តិការលើវិស័យទេសចរណ៍កម្ពុជា-ម៉ាឡេស៊ី (Term of Reference for Joint Working Group on Tourism Cooperation Between Cambodia and Malaysia)។

បន្ថែមពីការឯកភាពខាងលើ ក្នុងកិច្ចប្រជុំក្រុមការងាររួមស្តីពី «កិច្ចសហប្រតិបត្តិការលើវិស័យទេសចរណ៍កម្ពុជា-ម៉ាឡេស៊ី លើកទី១ (The First Joint Working Group on Tourism Cooperation between Cambodia and Malaysia)» នៅទីក្រុងម៉ាឡាកា ប្រទេសម៉ាឡេស៊ី ភាគីកម្ពុជា និងម៉ាឡេស៊ី បានឯកភាពឱ្យក្រុមការងារបច្ចេកទេស ប្រទេសទាំងពីរ បន្តពិភាក្សាលើផែនទីបង្ហាញផ្លូវ (Roadmap) នៃសកម្មភាពទេសចរណ៍រួម ដែលនឹងត្រូវអនុវត្តនៅក្នុងកិច្ចប្រជុំក្រុមការងាររួម ស្តីពីកិច្ចសហប្រតិបត្តិការលើវិស័យទេសចរណ៍កម្ពុជា-ម៉ាឡេស៊ី លើកទី២ នៅកម្ពុជា ក្នុងឆ្នាំ២០២៦ ខាងមុខ។

ក្នុងកិច្ចប្រជុំក្រុមការងាររួមស្តីពី «កិច្ចសហប្រតិបត្តិការលើវិស័យទេសចរណ៍កម្ពុជា-ម៉ាឡេស៊ី លើកទី១»ដែលឯកឧត្តមបណ្ឌិត ជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ បានដឹកនាំក្រុមការងារបច្ចេកទេសក្រសួងទេសចរណ៍ ចូលរួមកាលពីថ្ងៃទី២៨ ខែកញ្ញា ឆ្នាំ២០២៥ នេះ រៀបចំឡើងក្រោមស្មារតី នៃការអនុវត្តអនុស្សរណៈយោគយល់គ្នា (MoU) ស្តីពីកិច្ចសហប្រតិបត្តិការលើវិស័យទេសចរណ៍រវាងកម្ពុជា និងម៉ាឡេស៊ី ដែលបានចុះហត្ថលេខាកាលពីថ្ងៃទី៣ ខែកញ្ញា ឆ្នាំ២០១៩។ នេះបើតាមការចុះផ្សាយរបស់ក្រសួងទេសចរណ៍៕