ភ្នំពេញ៖ ក្រសួងទេសចរណ៍ និងសមាគមទីភ្នាក់ងារទេសចរណ៍កូរ៉េ (Korea Association of Travel Agents-KATA) រួមគ្នាជម្រុញចំនួនទេសចរកម្ពុជា-កូរ៉េឱ្យក្លាយជាទីផ្សារនាំមុខ។ នេះបើតាមការចុះផ្សាយរបស់ក្រសួងទេសចរណ៍ នាថ្ងៃទី៧ ខែមិថុនា ឆ្នាំ២០២៥។

ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ មានប្រសាសន៍ថា កិច្ចសហប្រតិបត្តិការជាមួយក្រសួងទេសចរណ៍របស់សមាគមនាំមុខគេមួយនៅកូរ៉េនេះ គឺជាកម្លាំងចលករជួយផ្សព្វផ្សាយសក្តានុពលទេសចរណ៍ និងកាលានុវត្តវិនិយោគរបស់កម្ពុជា ដល់ប្រជាជនកូរ៉េ ក៏ដូចជាវិនិយោគិនកូរ៉េ ដែលចាប់អារម្មណ៍វិនិយោគលើវិស័យទេសចរណ៍ ឱ្យមកទស្សនា និងបណ្តាក់ទុនវិនិយោគនៅកម្ពុជា បន្ថែម។

ក្នុងជំនួបរវាង ឯកឧត្តម ហួត ហាក់ និង លោក Lee Jin Seok ប្រធានសមាគមទីភ្នាក់ងារទេសចរណ៍កូរ៉េ (KATA) និងសហការី ដែលមានសមាជិកជិត ២,៣ម៉ឺននាក់ ក្នុងឱកាសសម្ពោធជាផ្លូវការពិព័រណ៍ទេសចរណ៍អន្តរជាតិសេអ៊ូល លើកទី៤០ ភាគីទាំងពីរ បានឯកភាពសិក្សាពិនិត្យលទ្ធភាពចុះអនុស្សរណៈនៃការយោគយល់គ្នា (MoU) និងការរៀបចំទស្សនកិច្ចស្វែងយល់ (FAMTRIP) នាពេលខាងមុខ។

MoU និងទស្សនកិច្ចនេះ ធ្វើឡើងដើម្បីមកពិនិត្យដោយផ្ទាល់ពីសក្តានុពលទេសចរណ៍ដ៏សំបូរបែប និងកាលានុវត្តវិនិយោគរបស់កម្ពុជា ជាពិសេសគឺការស្វែងយល់ច្បាស់ពីស្ថានភាពនយោបាយ សេដ្ឋកិច្ច សន្តិសុខសង្គម និងសណ្តាប់ធ្នាប់សាធារណៈ ដែលកម្ពុជាមាននាពេលបច្ចុប្បន្ន ក៏ដូចជាការធានានូវសុខសុវត្ថិភាពជូនដល់អ្នកទេសចរ និងវនិយោគិនអន្តរជាតិរបស់រាជរដ្ឋាភិបាលកម្ពុជា៕