ភ្នំពេញ៖ បច្ចុប្បន្ន Drone បានវិវត្តន៍ខ្លួនយ៉ាងឆាប់រហ័ស ដោយបានក្លាយជាឧបករណ៍ដ៏មានសារសំខាន់ប្រើប្រាស់នៅក្នុងវិស័យជាច្រើន ដែលការរីកចម្រើន នៃបច្ចេកវិទ្យាបានធ្វើឱ្យ Drone កាន់តែមានការអភិវឌ្ឍជាមួយនឹងមុខងារសំខាន់ៗជាច្រើន និងត្រូវបានគេចាត់ទុកថាជាឧបករណ៍ដ៏សំខាន់មួយផងដែរសម្រាប់អនាគតនៃការអភិវឌ្ឍបច្ចេកវិទ្យាឌីជីថល ក៏ដូចជាការអភិវឌ្ឍសង្គម សេដ្ឋកិច្ច សម្រាប់រយៈពេលវែង។

មុខងារ សំខាន់ៗនៃបច្ចេកវិទ្យា Drone មានដូចជា៖ ទី១.ការចាប់សញ្ញាពីចម្ងាយ គឺជាការប្រើប្រាស់កាមេរ៉ា, LiDAR និងឧបករណ៍ចាប់សញ្ញាផ្សេងទៀត ដើម្បីប្រមូលព័ត៌មានសម្រាប់ការធ្វើផែនទី ការស្ទង់មតិ និងការត្រួតពិនិត្យបរិស្ថានជុំវិញ។ ទី២. ប្រព័ន្ធទំនាក់ទំនង ដែលជួយសម្រួលដល់ការទាក់ទងក្នុងពេលវេលាជាក់ស្ដែង និងពីចម្ងាយរវាង Drone និងស្ថានីយ៍គ្រប់គ្រង Drone ដែលអនុញ្ញាតឱ្យប្រតិបត្តិការ និង ការបញ្ជូនស្ថិតិមានភាពរលូន។

ចំពោះ ទី៣. បច្ចេកវិទ្យាថ្ម ជាភាពជឿនលឿននៃបច្ចេកវិទ្យាថ្មបាននាំមកនូវពេលវេលាហោះហើរយូរជាងមុន, បង្កើនសមត្ថភាពផ្ទុក និងបង្កើនសមត្ថភាពទូទៅរបស់ Drone, ទី៤. ការជៀសវាងការប៉ះទង្គិច និងជៀសវាងពីឧបសគ្គនៅក្នុងផ្លូវហោះហើរ ជាមួយនឹងការរួមបញ្ចូលឧបករណ៍ចាប់សញ្ញា និងក្បួនដោះស្រាយអនុញ្ញាត Drone អាចធ្វើការស្វែងរក បានយ៉ាងងាយស្រួល។

ទី៥. បញ្ញាសិប្បនិម្មិត ដែលអនុញ្ញាតឱ្យ Drone អាចប្រមូលទិន្នន័យ ធ្វើការសម្រេចចិត្ត និងសម្របខ្លួន ទៅនឹងការផ្លាស់ប្តូរនៃបរិស្ថានដោយស្វ័យភាព ក៏ដូចជាបើកលទ្ធភាពថ្មីៗ សម្រាប់ការងារ ដូចជា ការដឹកជញ្ជូនដោយស្វ័យប្រវត្តិ ឬក៏ប្រតិបត្តិការស្វែងរក និងជួយសង្គ្រោះជាដើម៕