ភ្នំពេញ៖ ក្រុមហ៊ុន Renaissance Minerals (Cambodia) Ltd របស់អូស្ត្រាលី មានបំណងពង្រីកការវិនិយោគរបស់ខ្លួនបន្ថែមទៀត នៅក្នុងប្រទេសកម្ពុជា។ នេះបើតាមការលើកឡើងរបស់ លោក Morgan Hart នាយកគ្រប់គ្រងក្រុមហ៊ុន Renaissance Minerals (Cambodia) Ltd នាថ្ងៃទី២៥ ខែសីហា ឆ្នាំ២០២៥។

ក្នុងជំនួបពិសារអាហារពេលព្រឹកជាមួយ លោក Morgan Hart, ឯកឧត្តមឯកអគ្គរាជទូតកម្ពុជាប្រចាំអូស្ត្រាលី និងនូវែលហ្សេឡង់ និង ឯកឧត្តមឯកអគ្គរដ្ឋទូតអូស្ត្រាលីប្រចាំកម្ពុជា, ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងអំពីវឌ្ឍនភាពថ្មីៗរបស់កម្ពុជា និងលើកបង្ហាញដល់ដៃគូវិនិយោគិនអំពីសក្តានុពលផ្សេងទៀតរបស់កម្ពុជា និងចក្ខុវិស័យរបស់រាជរដ្ឋាភិបាលក្នុងការធ្វើឱ្យកម្ពុជា ក្លាយទៅជាប្រទេសមានចំណូលខ្ពស់ ត្រឹមឆ្នាំ២០៥០។

នាយកគ្រប់គ្រងក្រុមហ៊ុន Renaissance Minerals បានអរគុណដល់ ឯកឧត្តមឧបនាយករដ្ឋមន្ត្រី ដែលអនុញ្ញាតឱ្យលោកចូលជួបសម្ដែងការគួរសម ពិភាក្សាការងារ និងទទួលអនុសាសន៍អំពីការវិនិយោគរបស់ខ្លួននៅប្រទេសកម្ពុជា៕