ភ្នំពេញ៖ ឯកឧត្តម អ៊ូអិណុ អាត់ស៊ូស៊ី ឯកអគ្គរាជទូតជប៉ុន ប្រចាំកម្ពុជា សង្ឃឹមថា សន្តិភាពពេញលេញនៅកម្ពុជា នឹងត្រូវបានស្ដារឡើងវិញឱ្យបានលឿនបំផុត ដោយក្នុងនោះរដ្ឋាភិបាលជប៉ុន និងឯកឧត្តម ផ្ទាល់ នឹងខិតខំអស់ពីសមត្ថភាព ដើម្បីសម្រេចបាននូវចំណុចនេះ។

ឯកឧត្តម អ៊ូអិណុ អាត់ស៊ូស៊ី លើកឡើងដូច្នេះថា៖ «ខ្ញុំបានទៅឃើញជាក់ស្តែងតំបន់ ដែលបានរងផលប៉ះពាល់ដោយការប៉ះទង្គិចគ្នារវាង យោធាកម្ពុជា និងថៃ ក៏ដូចជាកន្លែងជម្រកសម្រាប់ពលរដ្ឋ ដែលបានភៀសខ្លួនចេញពីតំបន់ជម្លោះព្រំដែនកម្ពុជា-ថៃផងដែរ»។ នៅពេលបានឃើញអំពីទំហំនៃការខូចខាត ដោយសារការប៉ះទង្គិចរវាងយោធានេះ និងស្ថានភាពលំបាករបស់ពលរដ្ឋដែលបានភៀសខ្លួន ឯកឧត្តម អ៊ូអិណុ អាត់ស៊ូស៊ី មានការគ្រាំគ្រាចិត្តជាពន់ពេក៕