ភ្នំពេញ៖ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ចាត់ទុកវត្ថិភាពម្ហូបអាហារគឺជាអាទិភាពជាតិ ដែលទាមទារភាពជាក់លាក់ផ្នែកបច្ចេកទេស និងការសម្របសម្រួលស្ថាប័ន។ ឯកឧត្តម ហែម វណ្ណឌី លើកឡើងដូច្នេះក្នុងក្នុងកិច្ចប្រជុំលើកទី១ ដែលរៀបចំដោយគណៈកម្មាធិការមន្ទីរពិសោធន៍វិភាគម្ហូបអាហារ ។

ក្នុងកិច្ចប្រជុំ ពិភាក្សាកិច្ចដំណើរការជ្រើសរើសមន្ទីរពិសោធន៍វិភាគម្ហូបអាហារ ជាមន្ទីរពិសោធន៍យោង និងមន្ទីរពិសោធន៍ផ្លូវការនៅកម្ពុជា កាលពីថ្ងៃទី ១៣ ខែតុលា ឆ្នាំ២០២៥ ឯកឧត្តម ហែម វណ្ណឌី ឯកឧត្តមបានលើកឡើងថា៖ «គោលដៅរបស់យើងគឺរៀបចំយន្តការជ្រើសរើសមន្ទីរពិសោធន៍ផ្លូវការ និងមន្ទីរពិសោធន៍យោង សម្រាប់វិភាគម្ហូបអាហារ ព្រមទាំងអាចទទួលបានការគាំទ្រ និងពង្រឹងសមត្ថភាព ដើម្បីលើកកម្ពស់ភាពភាពអនុលោមនៃមន្ទីរពិសោធន៍ទាំងនោះ»។

ឯកឧត្តមបានបន្ថែមថា សុវត្ថិភាពម្ហូបអាហារប៉ះពាល់ផ្ទាល់ដល់សុខភាពអ្នកប្រើប្រាស់ និងទំនុកចិត្តទីផ្សារ ហើយការវាយតម្លៃទទួលស្គាល់មន្ទីរពិសោធន៍វិភាគម្ហូបអាហារ ដោយផ្អែកលើស្តង់ដារបច្ចេកទេស មានសារៈសំខាន់ ដើម្បីធានាថាមន្ទីរពិសោធន៍ទាំងនោះដំណើរការ និងផ្តល់លទ្ធផលវិភាគប្រកបដោយគុណភាព ភាពជឿជាក់ និងប្រសិទ្ធភាព។

ជាមួយគ្នានេះឯកឧត្តមរដ្ឋមន្ត្រី បានកោតសរសើរដល់សមាជិកគណៈកម្មាធិការមន្ទីរពិសោធន៍វិភាគម្ហូបអាហារ ចំពោះការប្តេជ្ញាចិត្ត ព្រមទាំងបានណែនាំឱ្យលេខាធិការដ្ឋាននៃគណៈកម្មាធិការនេះ រៀបចំផែនការប្រចាំឆ្នាំ និងរបបប្រជុំទៀងទាត់ ដើម្បីតាមដានវឌ្ឍនភាពការងារ។

ឯកឧត្តមក៏បានរំលឹកថា ការវាយតម្លៃទទួលស្គាល់ជាតិ និងអន្តរជាតិនឹងដើរតួនាទីសំខាន់ក្នុងការពង្រឹងសមត្ថភាពមន្ទីរពិសោធន៍វិភាគម្ហូបអាហារនៅកម្ពុជា ដែលនឹងបម្រើជាសសរស្តម្ភសម្រាប់ការពារសុខភាពសាធារណៈ និងកសាងទំនុកចិត្តរបស់អ្នកប្រើប្រាស់លើផលិតផលម្ហូបអាហារនៅកម្ពុជា។

គួរបញ្ជាក់ផងដែរថាកិច្ចប្រជុំខាងលើក៏បានអនុម័តលើដំណើរការនៃការជ្រើសរើសមន្ទីរពិសោធន៍ផ្លូវការ និងមន្ទីរពិសោធន៍យោង រាប់ចាប់ពីការដាក់ពាក្យស្នើសុំ និងការត្រួតពិនិត្យដល់ទីតាំង រហូតដល់ការសម្រេចជ្រើសរើស និងការចេញវិញ្ញាបនបត្រ សម្រាប់មន្ទីរពិសោធន៍ដែលមានលក្ខណសម្បត្តិគ្រប់គ្រាន់៕