ភ្នំពេញ៖ រដ្ឋាភិបាលជប៉ុន នឹងបន្តលើកទឹកចិត្តប្រទេសកម្ពុជា និងថៃ ដើម្បីជំរុញការអនុវត្តយ៉ាងប្រាកដប្រជានូវ «កិច្ចព្រមព្រៀងបទឈប់បាញ់ និងបន្ធូរបន្ថយភាពតានតឹង» តាមរយៈការសម្របសម្រួលជាមួយប្រទេសពាក់ព័ន្ធ។

សេចក្តីថ្លែងការណ៍របស់រដ្ឋមន្ត្រីការបរទេសជប៉ុន បញ្ជាក់ថា រដ្ឋាភិបាលជប៉ុន ចាត់ទុកទំនាក់ទំនងល្អរវាងប្រទេសកម្ពុជា និងថៃ មានសារសំខាន់ខ្លាំងណាស់សម្រាប់សន្តិភាព និងស្ថិរភាពក្នុងតំបន់។ ក្នុងន័យនេះ ប្រទេសជប៉ុន បាននិងកំពុងទំនាក់ទំនងជាមួយកម្ពុជា និងថៃ ដើម្បីបន្ធូរបន្ថយភាពតានតឹង។

ប្រទេសជប៉ុន បានអបអរសាទរកម្ពុជា និងថៃ ដែលបានសម្រេចឈានដល់កិច្ចព្រមព្រៀងបទឈប់បាញ់បន្ទាន់ និងឥតលក្ខខណ្ឌ។ ជប៉ុន ក៏បានវាយតម្លៃខ្ពស់ ចំពោះកិច្ចខិតខំប្រឹងប្រែងការទូតរបស់គ្រប់ភាគីពាក់ព័ន្ធ ដើម្បីសម្រេចបាននូវកិច្ចព្រមព្រៀងនេះ ដោយរួមមានប្រទេសម៉ាឡេស៊ី ជាម្ចាស់ផ្ទះនៃកិច្ចប្រជុំពិសេស និងសហរដ្ឋអាម៉េរិក ជាសហអ្នករៀបចំ៕