ភ្នំពេញ៖ អង្គការអន្តរជាតិខាងការងារ (ILO) ប្តេជ្ញាបន្តគាំទ្រកម្ពុជាលើការអភិវឌ្ឍវិស័យការងារសន្តិសុខសង្គម និងបណ្តុះបណ្តាលវិជ្ជាជីវៈ។ នេះបើតាមការលើកឡើងរបស់ឯកឧត្តម Gilbert F. Houngbo អគ្គនាយកអង្គការ ILO ក្នុងជំនួបជាមួយ ឯកឧត្តម សោម ចំណាន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ក្នុងសន្និសីទអន្ដរជាតិខាងការងារលើកទី១១៣ នៅទីស្នាក់ការអង្គការសហប្រជាជាតិ ទីក្រុងហ្ស៊ឺណែវ។

ក្នុងជំនួបនោះ ឯកឧត្តម សោម ចំណាន បានអរគុណដល់អង្គការ ILO សម្រាប់កិច្ចសហប្រតិបត្តិការ និងការគាំទ្រដល់កម្ពុជាលើការអភិវឌ្ឍវិស័យការងារ តាមរយៈការអនុវត្តគម្រោង និងកម្មវិធីជាច្រើន ពិសេសកម្មវិធីការងារសមរម្យប្រចាំប្រទេសកម្ពុជា (DWCP) ដែលបានរួមចំណែកក្នុងការធ្វើកំណែទម្រង់ទីផ្សារការងារ, ការលើកកម្ពស់ការងារសមរម្យប្រកបដោយបរិយាបន្នសម្រាប់យុវជន, ការអភិវឌ្ឍជំនាញ, ការពង្រីកដែននៃការគាំពារសង្គម និងការលើកកម្ពស់សមភាពយេនឌ័រ។

បន្ថែមលើនេះ ឯកឧត្តម សោម ចំណាន បានបញ្ជាក់ពីការប្តេជ្ញាចិត្តរបស់កម្ពុជាក្នុងការអនុវត្តគំនិតផ្តួចផ្តើមកាតាលីករសកល ស្តីពីការងារ និងការគាំពារសង្គម និងកម្មវិធីរោងចក្រកាន់តែប្រសើរនៅកម្ពុជា (ILO-BFC) ផងដែរ។ ជាមួយគ្នានេះ ឯកឧត្តម Gilbert F. Houngbo បានសរសើរកម្ពុជា ក្នុងនាមជាប្រទេសត្រួសត្រាយផ្លូវ នៃក្របខ័ណ្ឌកាតាលីករសកល ស្តីពីការងារ និងការគាំពារសង្គម ដែលបានដាក់បន្ស៊ីនូវយុទ្ធសាស្ត្រគាំពារសង្គម និងការងារ ជាមួយនឹងគោលដៅអភិវឌ្ឍន៍ជាតិរបស់កម្ពុជា។ នេះបើយោងតាមការចុះផ្សាយរបស់ក្រសួងការងារ និងបណ្តុះបណ្តាលវិជ្ជាជីវៈ៕