ភ្នំពេញ៖ យុទ្ធសាស្រ្តចក្រាវិស័យបរិស្ថាន ២០២៣-២០២៨ របស់ក្រសួងបរិស្ថាន ត្រូវបានរៀបចំឡើងដើម្បីតម្រង់ទិសការអនុវត្តការងារក្នុងវិស័យបរិស្ថាន ដែលមានយុទ្ធសាស្ត្រស្នូលមុំ៣ គឺការពង្រឹងគោលនយោបាយ ការកសាងរដ្ឋបាលឌីជីថល និងការពង្រីកការផ្សព្វផ្សាយ។ យុទ្ធសាស្ត្រស្នូលនេះ គឺជាកម្លាំងចលករដ៏សំខាន់ ដើម្បីជំរុញនិងគាំទ្រចំពោះយុទ្ធសាស្ត្រចំនួន ៣ទៀត រួមមានយុទ្ធសាស្ត្រទី១. ភាពស្អាត, យុទ្ធសាស្ត្រទី២.ភាពបៃតង និងយុទ្ធសាស្ត្រទី៣. ចីរភាព។

យុទ្ធសាស្រ្តចក្រាវិស័យបរិស្ថាននេះ នឹងលើកកម្ពស់វិស័យបរិស្ថានកម្ពុជា ក្នុងរយៈពេល ៥ឆ្នាំ ខាងមុខ ឱ្យកាន់តែរីកចម្រើន សំដៅធានាឱ្យបាននូវចីរភាពបរិស្ថាន និងសុក្រឹតកម្មបរិស្ថានកិច្ច ដើម្បីឆ្លើយតបនឹងការប្រែប្រួលអាកាសធាតុ និងលើកកម្ពស់ដល់សេដ្ឋកិច្ចបៃតងឱ្យរឹតតែមានប្រសិទ្ធភាព សម្រាប់ជាឧត្តមប្រយោជន៍ចំពោះប្រជាពលរដ្ឋកម្ពុជាគ្រប់ជំនាន់ និងលើកតម្កើងកិត្យានុភាពកម្ពុជា លើឆាកអន្តរជាតិ។

ឈរលើមូលដ្ឋាននៃសមិទ្ធផល ដែលរាជរដ្ឋាភិបាលសម្រេចបាន វិស័យបរិស្ថាន ត្រូវបានបន្តចាត់ជាទិសដៅអាទិភាពក្នុងកម្មវិធីនយោបាយរបស់ រាជរដ្ឋាភិបាល នីតិកាលទី៧នៃរដ្ឋសភា សម្រាប់កសាង និងការការពារមាតុភូមិ ឆ្នាំ២០២៣-២០២៨ និងយុទ្ធសាស្ត្របញ្ចកោណ ដំណាក់កាលទី១ ដើម្បីកំណើន ការពារសមធម៌ប្រសិទ្ធភាព និងចីរភាពកសាងមូលដ្ឋានគ្រឹះ ឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០ ក្រោមអាណត្តិដឹកនាំរបស់ សម្តេចធិបតី ហ៊ុន ម៉ាណែត។

ក្នុងបរិការណ៍នេះ ក្រសួងបរិស្ថាន ក្នុងនាមជាសេនាធិការរបស់រាជរដ្ឋាភិបាលកម្ពុជា បានរៀបចំយុទ្ធសាស្រ្តចក្រាវិស័យបរិស្ថាន ២០២៣-២០២៨ ជាផែនទីបង្ហាញផ្លូវ និងយន្តការអនុវត្តការងារក្នុងវិស័យបរិស្ថាន សម្រាប់រយៈពេល ៥ឆ្នាំ ខាងមុខ៕

ប្រភពពីសៀវភៅ៖ យុទ្ធសាស្រ្តចក្រាវិស័យបរិស្ថាន ២០២៣-២០២៨