ភ្នំពេញ៖ សហគ្រិនខ្មែរ និងផ្សារអ៊ីអន នឹងរៀបចំពិព័រណ៍ផលិតផលក្នុងស្រុក រយៈពេល ២សប្តាហ៍ ចាប់ពីថ្ងៃទី១៩ ខែឧសភា ដល់ថ្ងៃទី០១ ខែមិថុនា ឆ្នាំ២០២៥ នៅផ្សារទំនើបអ៊ីអនទាំង ៣សាខា គឺអ៊ីអនភ្នំពេញ អ៊ីអនសែនសុខ និងអ៊ីអនមានជ័យ។

ការចុះផ្សាយរបស់ សហគ្រិនខ្មែរ នាថ្ងៃទី១៣ ខែឧសភា ឆ្នាំ២០២៥ បានឱ្យដឹងថា ផលិតផលក្នុងស្រុកជាច្រើន ដែលយកមកតាំងពិព័រណ៍នេះដែរ គឺជាផលិតផលដែលបំពេញតាមស្តង់ដារ គុណភាព និងសុវត្ថិភាព មានដូចជា គ្រឿងទេស, របស់ប្រើប្រាស់ប្រចាំថ្ងៃ, បន្លែស្រស់, ទឹកដោះគោ, អង្ករ និងវត្ថុអនុស្សាវរីយ៍ជាច្រើនទៀត។ សហគ្រិនខ្មែរ ក៏បានអំពាវនាវឱ្យប្រជាពលរដ្ឋ ចូលរួមពិព័រណ៍ផលិតផលក្នុងស្រុកឱ្យបានកុះករផងដែរ ដើម្បីគាំទ្រផលិតផលខ្មែរ ថែសេដ្ឋកិច្ចជាតិ៕