ភ្នំពេញ៖ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានកាកបាទក្រហមកម្ពុជា បានឧបត្ថម្ភថវិកា ចំនួន ១០ម៉ឺនដុល្លារ ដល់កាកបាទក្រហមមីយ៉ាន់ម៉ា សម្រាប់ប្រតិបត្តិការជួយសង្រ្គោះប្រជាពលរដ្ឋ ដែលរងគ្រោះដោយការរញ្ជួយដី ៧.៧រ៉ិចទ័រ កាលពីថ្ងៃទី២៨ ខែមីនា ឆ្នាំ២០២៥កន្លងទៅ។

ជាមួយគ្នានេះ សម្តេចកិត្តិព្រឹទ្ធបណ្ឌិត ប៊ុន រ៉ានី ក៏បានអំពាវនាវឱ្យមានការគាំទ្រជំនួយបន្ថែមទៀត និងបានជូនពរឱ្យមីយ៉ាន់ម៉ាឆាប់ស្ដារឡើងវិញនៅតំបន់ដែលរងការបំផ្លិចបំផ្លាញ ជាមួយនឹងការខិតខំប្រឹងប្រែងរួមគ្នារបស់កាកបាទក្រហមមីយ៉ាន់ម៉ា សហព័ន្ធអន្តរជាតិនៃកាកបាទក្រហម អឌ្ឍចន្ទក្រហម (IFRC) គណៈកម្មាធិការអន្តរជាតិនៃកាកបាទក្រហម (ICRC) និងសមាគមជាតិផងដែរ។

សម្តេចកិត្តិព្រឹទ្ធបណ្ឌិត ប៊ុន រ៉ានី បានចូលរួមរំលែកសមានទុក្ខដ៏ក្រៀមក្រំ និងរំលែកនូវទុក្ខលំបាកជាមួយកាកបាទក្រហមមីយ៉ាន់ម៉ា និងប្រជាជនមីយ៉ាន់ម៉ាទាំងមូល ជាពិសេសក្រុមគ្រួសារជនរងគ្រោះ និងអ្នកដែលបាត់បង់មនុស្សជាទីស្រលាញ់ក្នុងការរញ្ជួយដី ៧.៧រ៉ិចទ័រ៕