ភ្នំពេញ៖ ក្រុមហ៊ុន MIRARTH កំពុងសិក្សាពីដំណើរការចម្រាញ់យកប្រេងពីសម្បកគ្រាប់ និងដើមស្វាយចន្ទី ដែលនឹងប្រើរយៈពេល ២ឆ្នាំ។ ពាក់ព័ន្ធនឹងដំណើរការផលិតនេះ ក្រុមហ៊ុន MIRARTH បានស្នើសុំកិច្ចសហការ និងការគាំទ្រពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើភាពអនុលោមតាមស្តង់ដារ និងការវិភាគសមាសធាតុអាហារូបត្ថម្ភនៃផលិតផលគ្រាប់សា្វយចន្ទី។

នាពេលជួបជាមួយ អគ្គនាយកដ្ឋានសហគ្រាសធុនតូចនិងមធ្យម និងសិប្បកម្ម នៃក្រសួងឧស្សាហកម្ម តំណាងក្រុមហ៊ុនជប៉ុន MIRARTH បានពិភាក្សាអំពីការពង្រីកសមត្ថភាពកែច្នៃគ្រាប់ស្វាយចន្ទីនៅកម្ពុជា និងបានលើកឡើងពីវឌ្ឍនភាពដែលក្រុមហ៊ុនបានបង្កើនសមត្ថភាពកែច្នៃគ្រាប់ស្វាយចន្ទីដល់ ១,៥០០តោន ក្នុងមួយឆ្នាំ។ តំណាងក្រុមហ៊ុន MIRARTH បញ្ជាក់ថា នៅពេលដែលក្រុមហ៊ុនចាប់ផ្តើមប្រតិបត្តិការរបស់ខ្លួន ក្នុងឆ្នាំ២០២១ ការកែច្នៃបានត្រឹមតែ ៣តោនប៉ុណ្ណោះ។

តំណាងក្រសួងឧស្សាហកម្ម បានសរសើរពីសមិទ្ធផលរបស់ក្រុមហ៊ុន MIRARTH និងយល់ព្រមគាំទ្រ និងសហការជាមួយក្រុមហ៊ុន ដើម្បីដោះស្រាយបញ្ហាប្រឈមនានា ព្រមទាំងស្វែងរកឱកាសបង្កើនការផលិត និងពង្រីកអាជីវកម្មរបស់ក្រុមហ៊ុនបន្ថែមទៀត។ នេះបើតាមការចុះផ្សាយរបស់ក្រសួងឧស្សាហកម្ម នាថ្ងៃទី៨ ខែតុលា ឆ្នាំ២០២៤៕