ភ្នំពេញ៖ កម្ពុជា ទទួលបានទុនបម្រុងអន្តរជាតិបានចំនួន ២២,៥ប៊ីលានដុល្លារ កើនឡើង ១២,៦% ដែលស្មើនឹងប្រមាណ ៧ខែ នៃការនាំចូលទំនិញនិងសេវាសម្រាប់គ្រាបន្ទាប់ នេះជាកម្រិតមួយខ្ពស់ជាងកម្រិតអប្បបរមាសម្រាប់ប្រទេសកំពុងអភិវឌ្ឍន៍។ នេះបើយោងតាមរបាយការណ៍ប្រចាំឆ្នាំ ២០២៤ របស់ធនាគារជាតិ នៃកម្ពុជា។

ចំពោះ វិស័យក្រៅប្រទេស សមតុល្យជញ្ជាំងទូទាត់កម្ពុជា ត្រូវបានប៉ាន់ស្មានថាមានអតិរេក ៤៣២,៥ លានដុល្លារ ដែលបណ្តាលមកពីការកើនឡើងពីទ្រព្យអកម្មបរទេសសុទ្ធនៃគណនីហិរញ្ញវត្ថុ ខណៈអតិរេកគណនីចរន្តនិងដើមទុនបានថយចុះ។ សេដ្ឋកិច្ចកម្ពុជា ត្រូវបានប៉ាន់ស្មានថាសម្រេចបានកំណើនរឹងមាំក្នុងអត្រា ៦% នៅឆ្នាំ២០២៤ ធៀបនឹង ៥%នៅឆ្នាំ២០២៣ ដែលគាំទ្រជាចម្បងដោយកំណើនខ្ពស់នៃវិស័យកម្មន្តសាល និងការបន្តងើបឡើងជាលំដាប់នៃវិស័យទេសចរណ៍។

រីឯ វិស័យកសិកម្មបន្ត មានវឌ្ឍនភាពល្អ ដោយផលិតកម្មស្រូវ កៅស៊ូ និងជលផល បានកើនឡើង ក្នុងនោះ វិស័យសំណង់ និងអចលនទ្រព្យមានកំណើនទន់ខ្សោយ ដោយសារការធ្លាក់ចុះតម្រូវការ ស្របពេលតម្លៃ អចលនទ្រព្យស្ថិតក្នុងស្ថានភាពកែតម្រូវ៕