ភ្នំពេញ៖ ការស្នើសុំច្បាប់មុនពេលដំណើរការមូលដ្ឋានផលិតកម្ម ជាពិសេសវិស័យកែច្នៃម្ហូបអាហារ ជារឿងសំខាន់ ព្រោះអាចទទួលបានទំនុកចិត្តពីដៃគូអាជីវកម្ម និងឱកាសអភិវឌ្ឍន៍អាជីវកម្ម ជ្រៀតចូលតាមបណ្តាផ្សារធំៗ និងផ្សារទំនើប ឬមានឱកាសអាចនាំចេញទៅក្រៅប្រទេស។

បើតាមការបញ្ជាក់របស់ នាយកដ្ឋានសហគ្រាសធុនតូច និងមធ្យម ការស្នើសុំច្បាប់នេះ ក៏ជួយឱ្យសហគ្រាសទទួលបានភាពអនុលោមស្របតាមច្បាប់ ស្តីពីការគ្រប់គ្រងរោងចក្រ-សិប្បកម្ម, អនុលោមតាមបទដ្ឋានសុវត្ថិភាព និងអនាម័យ ក្នុងការផលិត និងចរាចណ៍ផលិតផលនៅលើទីផ្សារ និងអាចប្រកួតប្រជែងនៅលើទីផ្សារអន្តរជាតិ។

ការស្នើសុំច្បាប់មុនពេលដំណើរការមូលដ្ឋានផលិតកម្ម ធ្វើឱ្យសហគ្រាសទទួលបានទំនុកចិត្តពីអ្នកប្រើប្រាស់ ឬអតិថិជនទៅលើការប្រើប្រាស់ផលិតផលរបស់ខ្លួន, កាត់បន្ថយផលប៉ះពាល់បរិស្ថាន និងសុវត្ថិភាពការងារ, មានឱកាសចូលរួមវគ្គបណ្តុះបណ្តាលផ្សេងៗទាក់ទងនិងវិស័យ SMEs និងទទួលបានការលើកទឹកចិត្តពីរដ្ឋាភិបាល ដូចជាលើកលែងពន្ធ ការប្រើប្រាស់វត្ថុធាតុដើម និងការនាំចូលគ្រឿងចក្រគ្រឿងម៉ាស៊ីនជាដើម៕