ភ្នំពេញ៖ តុលាការកំពូល និងមហាអយ្យការអមតុលាការកំពូល នឹងបន្តសហការជាមួយក្រសួងប្រៃសណីយ៍ និងទូរគមនាគមន៍ ដាក់ឱ្យប្រើថ្នាលនិងកម្មវិធីរដ្ឋាភិបាលឌីជីថល ក្នុងការអភិវឌ្ឍនិងប្រើប្រាស់កម្មវិធីគ្រប់គ្រងសំណុំរឿង ដើម្បីបង្កើនការផ្តល់នូវសេវាយុត្តិធម៌សម្រាប់សង្គមជាតិ។ នេះបើតាមសេចក្តីប្រកាសព័ត៌មានរបស់ក្រសួងប្រៃសណីយ៍ កាលពីថ្ងៃទី៣០ ខែតុលា ឆ្នាំ២០២៤។

តុលាការកំពូល និងក្រសួងប្រៃសណីយ៍ នឹងជំរុញការបណ្តុះបណ្តាលនិងការចាប់យកឌីជីថលរបស់មន្រ្តីនៃតុលាការកំពូលនិងមហាអយ្យការអមតុលាការកំពូល ឱ្យកាន់តែមានគុណភាពល្អប្រសើរ និងប្រសិទ្ធភាពទៀតផង។ ជាមួយគ្នានេះ តុលាការកំពូល កំពុងជំរុញការធ្វើបរិវត្តកម្មឌីជីថល និងកែប្រែស្ថាប័នទៅជាស្ថាប័នឌីជីថល ដើម្បីលើកកម្ពស់ប្រសិទ្ធភាពនៃការផ្តល់សេវាយុត្តិធម៌ ប្រកបដោយគុណភាព ភាពឆាប់រហ័ស ងាយស្រួល សុក្រឹតភាព និងតម្លាភាពផងដែរ។

តាមរយៈការចុះហត្ថលេខាលើអនុស្សរណៈនៃការយោគយល់គ្នា(MOU) ជាមួយក្រសួងប្រៃសណីយ៍ ស្ដីពី «កិច្ចសហប្រតិបត្តិការដាក់ឱ្យប្រើថ្នាលផ្ទៀងផ្ទាត់ឯកសារ verify.gov.kh និងការរៀបចំហេដ្ឋារចនាសម្ព័ន្ធ និងការតភ្ជាប់អ៊ីនធឺណិត» តុលាការកំពូល ទទួលបាននូវវឌ្ឍនភាពនៃបរិវត្តកម្មឌីជីថលចំនួន៤។ វឌ្ឍនភាពនៃបរិវត្តកម្មឌីជីថលចំនួន៤ ដែលតុលាការកំពូលទទួលបាននោះ រួមមាន៖ ទី១. បញ្ចប់នូវការរៀបចំហេដ្ឋារចនាសម្ព័ន្ធនិងការតភ្ជាប់អ៊ីនធឺណិត, ទី២. ការបណ្ដុះបណ្ដាលលើជំនាញឌីជីថលចំនួន ២វគ្គ គឺវគ្គសន្តិសុខសាយប័រ និងវគ្គអក្ខរកម្មឌីជីថល ដល់មន្ត្រីតុលាការកំពូលសរុបចំនួន១១២ និងទី៣. បញ្ចប់កិច្ចពិភាក្សាបច្ចេកទេសលើការដាក់ឱ្យប្រើប្រាស់ថ្នាលផ្ទៀងផ្ទាត់ឯកសាររបស់រាជរដ្ឋាភិបាល verify.gov.kh។

ចំពោះទី៤. ទទួលបាននូវ៖ កុំព្យូទ័រចំនួន ១១៦គ្រឿង, Domain Controller សម្រាប់គ្រប់គ្រងសិទ្ធិអ្នកប្រើប្រាស់, Server ជំនាន់ថ្មីសម្រាប់គ្រប់គ្រងសំណុំរឿងចំនួន ១គ្រឿង, Server សម្រាប់គ្រប់គ្រងការព្រីននិងការស្គែនឯកសារចំនួន ១គ្រឿង, ម៉ាស៊ីនព្រីននិងស្គែនចំនួន ១០គ្រឿង, ការ Hosting វេបសាយរបស់តុលាការកំពូល និងអាជ្ញាប័ណ្ណ Office 365៕