ភ្នំពេញ៖ គម្រោង «ការពង្រឹងសុវត្ថិភាពហិរញ្ញវត្ថុក្នុងសហគមន៍» នឹងចូលរួមចំណែកជួយឱ្យពលរដ្ឋចេះគ្រប់គ្រងនិងចាត់ចែងលុយកាក់ក្នុងគ្រួសារ យល់ដឹងពីសិទ្ធិនិងកាតព្វកិច្ចពាក់ព័ន្ធនឹងកម្ចី ចៀសផុតពីការចាញ់បោកផ្នែកហិរញ្ញវត្ថុ និងជួយបញ្ចៀសបំណុលច្រើនលើសលប់របស់ពលរដ្ឋ។ នេះជាការលើកឡើងរបស់លោកជំទាវ ឌិត នីតា ប្រធានសមាគមមីក្រូហិរញ្ញវត្ថុកម្ពុជា កាលពីថ្ងៃទី៨ ខែតុលា ឆ្នាំ២០២៤។

ក្នុងសិក្ខាសាលាស្តីពី ការផ្សព្វផ្សាយលទ្ធផលគម្រោង ការពង្រឹងសុវត្ថិភាពហិរញ្ញវត្ថុក្នុងសហគមន៍ «លើការលើកកម្ពស់ចំណេះដឹងផ្នែកហិរញ្ញវត្ថុ សិទ្ធិ និងកិច្ចការពារអតិថិជន» លោកជំទាវ ឌិត នីតា បញ្ជាក់ថា គម្រោងនេះ បានបង្កើតទ្បើងស្របតាមយុទ្ធសាស្រ្តជាតិស្តីពី បរិយាបន្នហិរញ្ញវត្ថុ ឆ្នាំ២០១៩-២០២៥ និងឆ្លើយតបទៅនឹងតម្រូវការជាក់ស្តែងតាមមូលដ្ឋាន។ គម្រោងពង្រឹងសុវត្ថិភាពហិរញ្ញវត្ថុ គឺបានលើកកម្ពស់ចំណេះដឹងហិរញ្ញវត្ថុ សិទ្ធិ និងកិច្ចការពារអតិថិជន តាមរយៈការកសាងសមត្ថភាពភាគីពាក់ព័ន្ធ ពិសេសអាជ្ញាធរភូមិ ឃុំ ដែលជាជនបង្គោលដើម្បីបញ្ជ្រាបចំណេះដឹងដល់ប្រជាជនក្នុងសហគមន៍។

គម្រោង ការពង្រឹងសុវត្ថិភាពហិរញ្ញវត្ថុក្នុងសហគមន៍ ត្រូវបានដាក់ឱ្យដំណើរការជាផ្លូវការ កាលពីថ្ងៃទី២៤ ខែកុម្ភៈ ឆ្នាំ២០២៣ និងកំពុងអនុវត្តសាកល្បងក្នុងខេត្តចំនួន៤ រួមមាន៖ កំពង់ធំ កំពង់ស្ពឺ ស្វាយរៀង និងបាត់ដំបង។ ក្នុងពេលសាកល្បង គម្រោងសម្រេចបានលទ្ធផល ដូចជាបណ្តុះបណ្តាលគ្រូបង្គោលថា្នក់ឃុំបាន 0២វគ្គ ដែលមានអ្នកចូលរួមចំនួន៥៩រូប ក្នុងនោះមានស្រ្តីចំនួន ១៦នាក់ ក្នុងនោះគ្រូបង្គោលថ្នាក់ឃុំគឺមកពីខេត្តកំពង់ធំ បាត់ដំបង កំពង់ស្ពឺ និងខេត្តស្វាយរៀង៕