ភ្នំពេញ៖ វិទ្យាស្ថានបច្ចេកទេសរបស់កម្ពុជា និងសាលាពហុបច្ចេកទេសរបស់សិង្ហបុរី នឹងសហការបណ្តុះបណ្តាលជំនាញបច្ចេកទេសកម្រិតស្តង់ដារសិង្ហបុរី នៅកម្ពុជា ក្នុងគោលដៅពង្រឹងកម្រិតបណ្តុះបណ្តាលជំនាញឱ្យកាន់តែប្រសើរស្របតាមតម្រូវការទីផ្សារ។ កិច្ចសហការនេះ បានព្រមព្រៀងដោយឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងលោក AW TUAN KEE នាយករងសាលាពហុបច្ចេកទេស Tamesak នៃសិង្ហបុរី។

ឯកឧត្តម ហេង សួរ បានលើកឡើងថា វិទ្យាស្ថានបច្ចេកទេស និងសាលាពហុបច្ចេកទេសរបស់កម្ពុជា-សិង្ហបុរី នឹងសហការបណ្តុះបណ្តាលធនធានមនុស្ស និងនិយាមសិក្សាស្តង់ដាររបស់សិង្ហបុរីមកបណ្តុះបណ្តាលជំនាញនៅកម្ពុជា ដើម្បីជាគន្លឹះពង្រឹងកម្រិតជំនាញតាមតម្រូវការទីផ្សារឱ្យកាន់តែមានប្រសិទ្ធភាពខ្ពស់។

ក្នុងកិច្ចពិភាក្សារវាងភាគីទាំងពីរ នាថ្ងៃទី២២ ខែកក្កដា ឆ្នាំ២០២៤ លោក AW TUAN KEE បានគាំទ្រ ចំពោះកិច្ចសហការរបស់សាលាបច្ចេកទេសរវាងប្រទេសទាំងពីរ ដើម្បីពង្រឹងធនធានមនុស្សឱ្យមានស្តង់ដារខ្ពស់និងជាប្រយោជន៍ដ៏សំខាន់សម្រាប់អភិវឌ្ឍន៍សង្គមជាតិកម្ពុជាឱ្យទទួលបានជោគជ័យ។ នេះបើតាមការចុះផ្សាយរបស់ក្រសួងការងារ និងបណ្តុះបណ្តាលវិជ្ជាជីវៈ នាថ្ងៃទី២២ ខែកក្កដា ឆ្នាំ២០២៤៕