ភ្នំពេញ៖ មូលនិធិគន្ធបុប្ផាកម្ពុជា អំពាវនាវឱ្យសប្បុរសជនទាំងក្នុង និងក្រៅប្រទេសទាំងអស់ ប្រុងប្រយ័ត្ន និងពិនិត្យមើលឈ្មោះគណនីនៅលើអេក្រង់ទូរសព្ទឱ្យបានច្បាស់មុននឹងស្កែន QR Code បរិច្ចាគក្នុងយុទ្ធនាការ«១ម៉ឺនរៀល ១ម៉ឺននាក់» ឆ្នាំ២០២៤ ដើម្បីចៀសវាងការក្លែងបន្លំ QR Code ផ្ទាល់ខ្លួនពីជនខិលខូច។

បើតាមសេចក្តីជូនដំណឹងរបស់មូលនិធិគន្ធបុប្ផាកម្ពុជា នាថ្ងៃទី០៧ ខែមិថុនា ឆ្នាំ២០២៤ បានបញ្ជាក់ថា QR Code ដែលត្រឹមត្រូវ របស់មូលនិធិគន្ធបុប្ផាកម្ពុជា គឺនៅពេលស្កែននឹងឃើញឈ្មោះ «មូលនិធិគន្ធបុប្ផាកម្ពុជា» ជាអ្នកទទួលនៅលើអេក្រង់ទូរសព្ទរបស់សប្បុរសជនផ្ទាល់តែម្តង។

សូមជម្រាបថា ចាប់តាំងពីប្រកាសបើកយុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៤ កាលពីថ្ងៃ១ មិថុនា កន្លងទៅ មូលនិធិគន្ធបុប្ផាកម្ពុជា ទទួលបានថវិកាបរិច្ចាគសមមូលជាប្រាក់ដុល្លារចំនួនប្រមាណ ១លាន ២៧ម៉ឺនដុល្លារ ពីសប្បុរសជនជាង ១២ម៉ឺននាក់។ យុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៤ របស់មូលនិធិគន្ធបុប្ផាកម្ពុជានេះ គឺមានរយៈពេល ១ខែពេញ ដែលចាប់ពីថ្ងៃទី១ ដល់ថ្ងៃទី៣០ ខែមិថុនា ឆ្នាំ២០២៤៕