ភ្នំពេញ៖ ក្រុមហ៊ុនក្នុងវិស័យកសិកម្មជាង២០ មកពីប្រទេសឥណ្ឌា មានចំណាប់អារម្មណ៍នាំចេញគ្រាប់ស្វាយចន្ទីពីកម្ពុជា ទៅកាន់ប្រទេសឥណ្ឌា ស្របពេលដែលឥណ្ឌាមានតម្រូវការនាំចូលគ្រាប់ស្វាយចន្ទីក្នុងបរិមាណធំ និងភាគច្រើននាំចូលពីបណ្តាប្រទេសអាហ្វ្រិក ក្នុងពេលកន្លងមក។

ក្នុងកម្មវិធីផ្គូរផ្គងកសិពាណិជ្ជកម្ម រវាងក្រុមហ៊ុននៅក្នុងវិស័យកសិកម្មជាង២០ មកពីប្រទេសឥណ្ឌា ជាមួយក្រុមហ៊ុននៅកម្ពុជា ក្រុមហ៊ុនឥណ្ឌាទាំងនេះ ក៏មានបំណងសិក្សាស្វែងយល់ពីសក្តានុពលសម្រាប់ការនាំចេញនាំចូលកសិផលពីប្រទេសទាំងសងខាង និងពិនិត្យលទ្ធភាពក្នុងការវិនិយោគលើការកែច្នៃនៅក្នុងស្រុកផងដែរ។ នេះបើតាមការចុះផ្សាយរបស់ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ នាថ្ងៃទី១១ ខែកញ្ញា ឆ្នាំ២០២៥៕