ភ្នំពេញ៖ ស្ថានទូតជប៉ុនប្រចាំកម្ពុជា បញ្ជាក់ថា រដ្ឋាភិបាលជប៉ុន មិនបានផ្តល់ដ្រូនចម្បាំងដល់ប្រទេសថៃ នោះទេ ដោយស្ថានទូតជប៉ុនប្រចាំកម្ពុជា ចាត់ទុកពាក្យចចាមអារ៉ាមនេះ ថាជាព័ត៌មានមិនពិត។ ជំនួយរបស់ប្រទេសជប៉ុនត្រូវបានកំណត់យ៉ាងតឹងរ៉ឹងចំពោះផ្នែកដែល មិនពាក់ព័ន្ធដោយផ្ទាល់ទៅនឹងជម្លោះអន្តរជាតិ។

ស្ថានទូតជប៉ុន បានបញ្ជាក់ផងដែរថា រដ្ឋាភិបាលជប៉ុន មិនធ្លាប់បានទទួលសំណើស្នើសុំដ្រូនចម្បាំងពីប្រទេសថៃនោះទេ។ រដ្ឋាភិបាលជប៉ុន ចាត់ទុកថា ការអនុវត្តកិច្ចព្រមព្រៀងបទឈប់បាញ់រវាងកម្ពុជា និងថៃ នឹងការស្តារឡើងវិញនូវសន្តិភាពឱ្យបានឆាប់។ ស្ថានទូតជប៉ុនប្រចាំកម្ពុជា អំណរគុណ ចំពោះការមិនផ្សព្វផ្សាយ និងចែកចាយ ព័ត៌មានក្លែងក្លាយនេះ។ ជប៉ុន សង្ឃឹមថា ប្រជាជនកម្ពុជានឹងអាចវិលទៅរកជីវភាពប្រចាំថ្ងៃដោយសុខសាន្តឱ្យបានឆាប់៕