ភ្នំពេញ៖ ក្រុមហ៊ុនអាមេរិក Argentem Creek ជាក្រុមហ៊ុនបណ្តាក់ទុនវិនិយោគដ៏សំខាន់មួយ ក្នុងក្រុមហ៊ុន Salmon Group ដែលជាប្រតិបត្តិករបច្ចេកវិទ្យាហិរញ្ញវត្ថុនៅប្រទេសហ្វីលីពីន កំពុងស្វែងរកឱកាសពង្រីកអាជីវកម្មរបស់ខ្លួននៅប្រទេសកម្ពុជា។ នេះបើយោងតាមការចុះផ្សាយរបស់ ធនាគារជាតិនៃកម្ពុជា​ នាថ្ងៃទី៤ ខែសីហា ឆ្នាំ២០២៥។

ក្នុងជំនួប ពិភាក្សាអំពី​គោលបំណងស្វែងរកឱកាស វិនិយោគក្នុងវិស័យហិរញ្ញវត្ថុនៅប្រទេសកម្ពុជា ជាមួយលោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា នាថ្ងៃទី៤ ខែសីហា ឆ្នាំ២០២៥ លោក Pravel Fedorov ប្រធានប្រតិបត្តិ និងសហស្ថាបនិកក្រុមហ៊ុន Salmon Group បានលើកឡើងថា ក្រុមហ៊ុន Salmon Group មានគំរូអាជីវកម្មដែលផ្តោតលើហិរញ្ញវត្ថុឌីជីថល និងមានសារៈសំខាន់នៃបទប្បញ្ញាត្តិដែលមានភាពអំណោយផល សម្រាប់ជំរុញការអភិវឌ្ឍនវានុវត្តហិរញ្ញវត្ថុថែមទៀត។

ជាមួយគ្នានេះលោកជំទាវបណ្ឌិត ជា សិរី​ ស្វាគមន៍ចំពោះក្រុមហ៊ុនអាមេរិក Argentem Creek​ ដែលចាប់អារម្មណ៍លើសក្តានុពលវិនិយោគក្នុងវិស័យហិរញ្ញវត្ថុកម្ពុជា​។ ជាមួយគ្នានេះ លោកជំទាវ ទេសាភិបាល​ លើកឡើង អំពីច្បាប់ស្តីពីវិនិយោគកម្ពុជា ដែលមានលក្ខណៈបើកចំហរសម្រាប់វិនិយោគិនបរទេស ព្រមទាំងការអភិវឌ្ឍហេដ្ឋារចនាសម្ព័ន្ធហិរញ្ញវត្ថុដែលមានលក្ខណៈអំណោយផល។

បន្ថែមលើនេះលោកជំទាវបណ្ឌិត ជា សិរី​ បានណែនាំ ពីជម្រើសសំខាន់ៗមួយចំនួនសម្រាប់ការ ចូលមកវិនិយោគក្នុងវិស័យហិរញ្ញវត្ថុកម្ពុជា លើកដំបូងឱ្យទទួលបានជោគជ័យ ដើម្បីផ្តល់ជាសារដ៏សំខាន់ក្នុងការផ្តល់ទំនុកចិត្តនិងការទាក់ទាញវិនិយោគបន្ថែមទៀតមកកម្ពុជា។

លោកជំទាវបណ្ឌិត ជំរុញលើកទឹកចិត្ត ឱ្យក្រុមហ៊ុនបន្តទំនាក់ទំនងជាមួយមន្រ្តីជំនាញក្នុងការ ផ្លាស់ប្តូរព័ត៌មាន សំដៅធ្វើការសម្រេចចិត្តវិនិយោគត្រឹមត្រូវ។ លោកជំទាវបណ្ឌិត ​ក៏បានជំរុញឱ្យក្រុមវិនិយោគិនទៅ ទស្សនាសារៈមន្ទី ព្រះស្រីឦសានវរ្ម័ន (ស.ស.រ.) ដើម្បីឈ្វេងយល់ពីប្រវត្តិសេដ្ឋកិច្ច និងរូបិយវត្ថុកម្ពុជា៕